Read Timugon Murut KAINGKUALAN 31 Bible Online

KAINGKUALAN 31 - Timugon Murut bible

KAINGKUALAN 31

¹Indagu TUHAN ri Musa,

²“Nampili' Aku ri Bijalil anak ri Uri, akupu ri Gur, intor ra bansa' ru Jiuda.

³Nanaak Aku ri Bijalil ra kuasa' Kuno.[47] Nanaak Aku riso ra pangaratian, katasikan am kapandayan ralalom ngaangai' salinut ru kandoi seni:

⁴Koson mangatang ra baal matuyu' ondo' mompogogot ra katasikan mambaal raginio mampakai ra mas, pirok am gangsa';

⁵koson mamutul ra batu parmata ondo' tuyuon; koson mangukir ra tataun am koson mambaal ra ngaangai' salinut ru kandoi seni ra bokon.

⁶Nampili' Aku niayuk ri Ogoliab anak ri Agisamak intor ra bansa' ru Dan, koson mangandoi ri Bijalil. Nanaak Aku noyo ra kapandayan ondo' matuyu' ru ngaangai' ondo' mangatasik, maa' raginio ngaangai' susuban Kuno mabaal nilo:

⁷Kim ru TUHAN, Kaban Nabantuan am panaub no, ngaangai' kuliamos ru Kim ru TUHAN,

⁸mija' am kuliamos no, tampakan ra lampung intor ra mas kopoyo am kuliamos no, altar ru panalaban ra kaminyan,

⁹altar ru taak simbalui koson mapabansuk ra guang ru TUHAN[48] am ngaangai' kuliamos no, bisin am antulan no,

¹⁰bayang ru sambayang ru imam, ondo' bayangon ri Arun am anak-anak nano paat ra ilo mangandoi koson ra imam,

¹¹umau upacara am kaminyan ondo' maamis owou tayar ru Lamin Pansunuran. Musiti' baalon nilo ngaangai' no topot koson ra susuban Kuno rirun.”

¹²Nanusub TUHAN ri Musa

¹³koson mambala' ra ulun ru Israil, “Iantakon orou Sabat, orou ondo' inaru' Kuno koson orou tangusan, sabap ra orou raginio iono rondo' tatandu' ru Aku am akau ra sabuoi-buoi no, koson manulu' ra Aku, TUHAN napasauk ramuyun ra ulun Kuno galama'.

¹⁴Musiti' min iantakon orou tangusan no, sabap ra orou raginio mapasau. Osoi ondo' kalo mangiantak ra orou raginio, am mangandoi ra orou raginio musiti' ukumin potoyo'.

¹⁵Pongondoyon kau buoi kaanaman, kaa' orou katulu' iono orou tangusan ondo' matulai, ondo' patimpokon Raki'. Osoi mangandoi ra orou raginio musiti' ukumin potoyo'.

¹⁶Musiti' ulun ru Israil mangiantak ra orou no koson tatandu' nabantuan.

¹⁷Orou raginio rondo' tatandu' ondo' mantilayun ru Aku am ulun ru Israil, sabap ra Aku, TUHAN napasauk ra limbowon am tana' ti buoi kaanaman; paat ra orou ra katulu' minuog Aku mangandoi, am tangus Aku.”

¹⁸Kopongo TUHAN minindagu ri Musa giu' ra Gunung Sinai, panaak i Aki Kapuuno' riso ruo batu pamatikan ondo' tinulisan ri Aki Kapuuno' galama' ra susuban Nano.