Read Timugon Murut KAINGKUALAN 32 Bible Online

KAINGKUALAN 32 - Timugon Murut bible

KAINGKUALAN 32

¹Pakakito ulun ru Israil ra soroi i Musa ra nabuoi kaga' giu' ra gunung no, am kalo niayuk poyo timinuun io, limpu ilo ri Arun am indagu riso, “Kalo nakapandai takau atan boo nasauk ri Musa, ondo' naningganai ritakau miningkual intor ra Misir; ginio ra baali' akai rondo' tuhan[49] koson maningganai ramon.”

²Indagu i Arun risilo, “Paguso' anting-anting mas ondo' inanting ru andu', anak ungkuyon am anak ruandu' min, am ibito' ngaangai' no raki'.”

³Paguso' nilo ngaangai' anting-anting mas am taaki' ngaangai' no ri Arun.

⁴Alapo' ri Arun anting-anting no, luwo' ngaangai' no am pasasaro' mas no ralalom acuan, am pambaal rondo' sinungkalalaing ru sapi' gawayan. Indagu ulun raginilo, “Israil, gitio noyo tuhan takau ondo' nagibit ritakau miningkual intor ra Misir!”

⁵Pambaal boo i Arun rondo' altar ra saang ru sapi' mas no am pampatanou, “Susuab no rumamai takau koson mangurumat ra TUHAN.”

⁶Ra susuab toojo ru suabon no ibito' nilo kukula' ngainan bibiag koson ra pataakon ra simbaluyon, am kukula' ngainan poyo taak simbalui koson makibarakat ra TUHAN.[50] Turung ilo ra mangakan am manginum, am ingkakat ra rumamai ra jajajou.

⁷Indagu TUHAN ri Musa, “Kataki' noyo tuun sabap ra ulun muno ondo' tiningganai muno miningkual intor ra Misir nambaal ra tula am nangimpai Raki'.

⁸Siminiang ilo intor ra susuban Kuno. Nambaal ilo ra sinungkalalaing ru sapi' intor ra mas linuu, am sumamba raginio; napataak ilo niayuk ra taak simbalui raginio. Kon nilo ginio noyo tuhan nilo ondo' naningganai risilo miningkual intor ra Misir.

⁹Nakapandai aku ra bambalingatan kaga' ulun raginilo.

¹⁰Raino pai' Aku ompongo'. Sumangit Aku risilo am masaga' mamuso risilo. Kaa' saukon Tokou am papag muno ra rondo' bansa' ondo' maayo.”

¹¹Kaa' pakimasi' i Musa ra TUHAN i Aki Kapuuno' nano am indagu, “TUHAN, kua kia sangit Kou kaga' ra ulun Muno ondo' pinalabus Muno intor ra Misir ralalom ru kuasa' am kaikangan ra maayo?

¹²Amon ru pusoon Mu ilo, mindagu boo ulun ru Misir ra inibit Mu ilo miningkual intor ra Misir koson mamatoi risilo giu' ra kagunungan am mamuso lingon risilo. Pai' boo sangit, kulawo' ginuang Muno am pai' palumpaa' karaat ti ra ulun Muno.

¹³Karaa' ulipon Muli, i Abragam, i Isak am i Jakub. Karaa' binantu' Muli risilo koson mangani' risilo ra papag ra kinasuang ru butitin giu' ra limbowon, am mangani' risilo ra titikop ru tana' ragitio koson ra longgom nilo ra sabuoi-buoi no.”

¹⁴Ginio ra kulawo' ru TUHAN ginuang Nano am kalo sinugut No inatang ra karaat koson palumpaan ra ulun Nano.

¹⁵Tuun i Musa intor ra gunung liliwa' nagibit ruo batu pamatikan ondo' tinulisan ra susuban ri Aki Kapuuno' ra karuo-ruo ralimbou no.

¹⁶Binaal galama' ri Aki Kapuuno' ruo batu pamatikan no am tinulisan ra susuban Nano raginio.

¹⁷Naining ri Josua giminolok-golok ulun ru Israil, am indagu io ri Musa, “Maining ku bolos pangayawan giu' ra nangkiman.”

¹⁸Indagu i Musa, “Sala' ka bolos ginio ru kamanangan kapoam naala; bolos ginio ru ulun marimbai.”

¹⁹Pakainggaar i Musa ra nangkiman no am pakakito ra sinungkalalaing ru sapi' intor ra mas no am saliligo' mamagun, am sangit io. Giu' no lonson toojo ru gunung, pinaambang no batu pamatikan ra inibit nano saboi nopopol toojo.

²⁰Alapo' ri Musa sinungkalalaing ru sapi' intor ra mas ondo' binaal nilono, am luwo' am tutuo' saboi naumok, lauki' no boo ra timug. Susubo' boo ri Musa ulun ru Israil manginum ra timug no.

²¹Indagu i Musa ri Arun, “Atan kia ondo' binaal ru ulun ragitilo rirun saboi mopoloso kou risilo makatula ra maayo?”

²²Taam i Arun, “Pai' sangit raki'. Nakapandai kou ra mapara' kotog ru ulun ragitilo mambaal ra kalaatan.

²³Minindagu ilo raki', ‘Kalo nakapandai takau atan boo nasauk ri Musa, ondo' naningganai ritakau miningkual intor ra Misir. Ginio ra baali' akai rondo' tuhan koson maningganai ramon.’

²⁴Susubo' ku ilo mangani' ra limpor mas raki', am paguso' ru ulun ondo' makalimpor no am taaki' nilo raki'. Pasuboo' ku limpor mas no ra apui, am kasauk boo sapi' ti.”

²⁵Nalimanan ri Musa ra pinoloso ri Arun ulun ru Israil jajajou ra kalo boo masalingapu, saboi mitauyu' ilo ra saang ru pantula'.

²⁶Ginio ra bigor i Musa ra kulobon umpasan ra nangkiman am golok, “Musiti' moonong ulun ondo' sumugut ra TUHAN matong ragiti!” Ginio ra timung ngaangai' bansa' ru Liwi ra liput ri Musa.

²⁷Indagu boo i Musa risilo, “TUHAN i Aki Kapuuno' ru Israil nanusub ra moonong ulun mapaakang ra ilang, am mugar intor ra kulobon ru nangkiman ti mongoi ra kulobon tampilon ra giu' no, am mamatoi ra pabukat-pabukat, rangan-rangan am pasambalayan nano.”

²⁸Ginagaya' ru bansa' ru Liwi no, am namatoi ra olo'-olo' talu ngaribu ngaulun ra orou raginio.

²⁹Indagu i Musa ra bansa' ru Liwi no, “Orou raiti' patimpokon kau noyo[51] koson ra imam ondo' mangandoi ra TUHAN, am mamatoi ra anak ungkuyon min am pabukat mino; am nangani' TUHAN ra barakat Nano ramuyun.”

³⁰Suabon no indagu i Musa ra ulun ru Israil, “Makatula kau ra maayo. Kaa' magaloi aku poyo ra gunung no muma' ra TUHAN; gama' ru makaalap aku ra pangampunan ra tula min.”

³¹Saguli' i Musa uma' ra TUHAN am indagu, “Nambaal ulun raginilo ra tula maayo. Nambaal ilo ra tuhan intor ra mas am sinamba nilo.

³²Ampuno' noyo tula nilo; amon ru kalo, luluo' inggalan kuno intor ra kitab nanulisan Muno ra inggalan ru ulun Muno.”

³³Taam TUHAN, “Ulun ondo' makatula noyo Raki' ayuk luluon Ku inggalan no intor ra kitab Kuno.

³⁴Ugar no raino am ibito' ulun raginilo mongoi ra intok ondo' sinabit Ku noyo rirun. Karaa', maningganai malaikat Kuno rirun, kaa' masaboi paat no ra mangukum Aku ra ulun ragitilo sabap ra tula nilo.”

³⁵Porotongo' boo ru TUHAN maruol ra ulun raginilo, sabap ra nampajajal ilo ri Arun nambaal ra sinungkalalaing ru sapi' intor ra mas.