Read Timugon Murut KAINGKUALAN 39 Bible Online

KAINGKUALAN 39 - Timugon Murut bible

KAINGKUALAN 39

¹Pambaal ilo ra bayang moonsoi tayar ru imam-imam no intor ra konoon makabatik motomou, matanggilung am malia'. Bayangon ru imam-imam bayang no paat ra ilo mangandoi giu' ra Lamin Matulai. Mambaal ilo ra bayang imam ri Arun koson ra nanusuban ru TUHAN ri Musa.

²Pambaal ilo ra efod intor ra konoon linon molomos, konoon bulu makabatik motomou, matanggilung am malia' am banang mas.

³Tinukul nilo pila' ru mas am sauko' no ra kokoson ra banang malilis am patakinon ra konoon linon molomos am konoon bulu makabatik motomou, matanggilung am malia' ondo' binungaan ra sulaman.

⁴Kopongo ginio pambaal ilo ruo tali ru limbawo pamangkos ra efod, ondo' pinapikit ra kiing no.

⁵Abot ondo' binaal kalumiso' intor ra bahan nogondo' no, pinapikit ra efod no saboi nasauk rondo' tayar, koson ra nanusuban ru TUHAN ri Musa.

⁶Asaa' nilo batu sardis am kiniingan ra bingkai mas. Ra katasikan toojo, ukiro' nilo inggalan ru mopor am ruo ngaulun anak ri Jakub ra batu-batu parmata no.

⁷Patakino' boo batu-batu parmata no ra tali ru limbawo ru efod koson tatandu' pangkaraan ra koopor am ruo bansa' ru Israil, koson ra nanusuban ru TUHAN ri Musa.

⁸Pambaal ilo ra utau intor ra bahan raginio niayuk, nogondo' ra pinakai ra efod, am sulaman no pana nogondo'.

⁹Baal no apat persegi am pinurun ruo, gawar no 22 ngasintimito am pila' no 22 ngasintimito.

¹⁰Takini' nilo ra apat ngambaris batu parmata ra utau no. Baris kasaa' tinakinan ra batu dalima', batu topaj am batu garnit;

¹¹baris karuo tinakinan ra jamrud, batu nilam am batu berlian;

¹²baris katalu tinakinan ra batu pirus, batu akik, am batu kasubung;

¹³baris kaapat tinakinan ra batu biril, batu sardis am batu jaspir. Ngaangai' batu parmata no kiniingan ra bingkai mas.

¹⁴Moonong batu parmata no inukir rondo'-rondo' inggalan ru anak-anak ri Jakub no koson tatandu' pangkaraan ra mopor am ruo bansa' ru Israil.

¹⁵Pambaal ilo ra rantai intor ra mas kopoyo ondo' pinitol koson ra tali ru utau no.

¹⁶Pambaal ilo ruo bingkai mas am ruo golong mas, am patakino' ruo golong mas no ra pisuk tampilon rasawat ru utau.

¹⁷Pobongkoso' nilo ruo rantai mas no ra ruo golong mas,

¹⁸am pobongkoso' pompor ru rantai mas ra rondo' poyo ra karuo-ruo bingkai. Koson raginio makatunggul utau no ra tampilon saang ru tali ru limbawo ru efod.

¹⁹Pambaal ilo ruo golong mas am patakino' ra utau, pisuk tampilon ragana', tampilon ralalom no makatiu' ra efod.

²⁰Pambaal ilo ruo golong mas poyo, am patakino' tampilon ragana' ra saang ru ruo tali ru limbawo ru efod, maar ra tunggul ru pikit am tampilon rasawat ru abot ondo' binaal kalumiso'.

²¹Maaya' ra susuban ru TUHAN ri Musa, pobongkoso' nilo golong ru utau no ra golong ru efod ra tali motomou, maa' raginio soroi utau no rasawat ru abot am kalo malakas.

²²Bayang ondo' bayangon porolomon ra efod, ngaangai' no binaal intor ra konoon bulu makabatik motomou.

²³Luang ru liog no piniot ra konoon malilis maa' raginio kalo maluoi marilak.

²⁴Giu' ra liput ru kiing tampilon ragana' ru sukub no, pambaal ilo ra bunga' koson kawa' ru dalima' intor ra konoon linon molomos am konoon bulu makabatik motomou, matanggilung am malia' pinangkilolot ra lunsing intor ra mas kopoyo, sumugut ra susuban ru TUHAN ri Musa.

²⁷Pambaal ilo ra sukub intor ra konoon linon molomos bayangon ri Arun am anak-anak nano,

²⁸am niayuk serban, sigal, saluar mariwa' intor ra konoon linon,

²⁹abot intor ra konoon linon molomos, am konoon bulu makabatik motomou, matanggilung am malia', binungaan ra sulaman, koson ra nanusuban ru TUHAN ri Musa.

³⁰Pambaal ilo rondo' pamunga' intor ra mas kopoyo, rondo' tatandu' ondo' matulai ra patimpokon ilo noyo. Ginio ra pamunga' no inukir nilo ragu ragitio: “Patimpokon ra TUHAN”.

³¹Pamunga' no pinabangkos ra serban ra tali motomou, koson ra nanusuban ru TUHAN ri Musa.

³²Ngaangai' kandoi mambaal ra Kim ru TUHAN nopongo noyo. Binaal ngaangai' no ru ulun ru Israil koson ra nanusuban ru TUHAN ri Musa.

³³Ibito' nilo Kim ru TUHAN am ngaangai' kuliamos no ri Musa, sangutan, rangka, baak, lugu' am antulan ru lugu';

³⁴panaub intor ra kungkung ru domba gawayan ondo' kinalia'; panaub intor ra kungkung molomos; tabir;

³⁵Kaban Nabantuan ondo' makasuang ruo batu pamatikan, am niayuk tataun bandasan no am niayuk panaub no;

³⁶mija' am ngaangai' kuliamos no, ruti' ondo' pataakon ri Aki Kapuuno';

³⁷tampakan ra lampung intor ra mas kopoyo, lampung no, ngaangai' kuliamos no am umau ru lampung;

³⁸altar mas; umau upacara, kaminyan ondo' maamis owou; tabir ru kulobon ru Kim ru TUHAN;

³⁹altar gangsa' am kekisi no, tataun bandasan no am ngaangai' kuliamos no; bisin am antulan no;

⁴⁰tabir ru insor, lugu' ru insor am antulan ru lugu'; tabir ru kulobon ru insor am tali-tali no; paku' tataun ru Kim ru TUHAN; ngaangai' kuliamos ondo' pakayon ralalom Kim ru TUHAN;

⁴¹am bayang moonsoi tayar ru imam-imam, ondo' bayangon paat ra ilo mangandoi giu' ra Lamin Matulai, am bayang timpok ra Imam Arun am anak-anak nano.

⁴²Nopongo ru ulun ru Israil ngaangai' kandoi koson ra nanusuban ru TUHAN ri Musa.

⁴³Inilayan ri Musa ngaangai' no, am ilai' no ra binaal nilo totopot koson ra nanusuban ru TUHAN. Ginio ra barakato' ilo ri Musa.