Read Timugon Murut KAINGKUALAN 4 Bible Online

KAINGKUALAN 4 - Timugon Murut bible

KAINGKUALAN 4

¹Indagu boo i Musa ra TUHAN, “Ati kulaan boo amon ulun ru Israil kalo mangintopot raki' am marara' mampalio ra ragu-ragu kuno? Atan kia baalon kuno amon ru mindagu ilo ra Okou kalo minintalang raki'?”

²Ginio ra pangkuot TUHAN ri Musa, “Atan kia ginuut muno?” “Jujuga',” taam ri Musa.

³Indagu TUHAN, “Papatiro' ra tana' no.” Kapatiri' ri Musa jujuga' no ra tana', kasauk jujuga' no ra kukuo am lugut i Musa minggalur intor ra kukuo no.

⁴Indagu boo TUHAN ri Musa, “Inggaari' kukuo no am guuto' iku' nano.” Inggaari' ri Musa kukuo no am rokopo' no iku' nano; am kasauk saguli' kukuo no ra jujuga'.

⁵Indagu TUHAN, “Baalo' koson raginio ra mapainono' ra bansa' ru Israil ra Aku, TUHAN i Aki Kapuuno' ru kinamatuaan nilo, i Aki Kapuuno' ri Abragam, ri Isak am ri Jakub, minintalang noyo rirun.”

⁶Indagu poyo TUHAN ri Musa, “Pasubolo' kalindu' muno ralalom sukub muno.” Baalo' ri Musa koson raginio, am paat ra pinaingkual no kalindu' nano, mapulak kaga' kalindu' nano sabap ra natiu' ra maruol palaka' ondo' makalalaa'.

⁷Indagu boo TUHAN, “Pasubolo' kalindu' muno ralalom sukub muno igondo' poyo.” Baalo' ri Musa koson raginio am paat ra pinaingkual no kalindu' nano, napali' boo kalindu' nano am moonsoi koson ra ngaangai' inan nano.

⁸Indagu TUHAN, “Amon ru kalo masaga' ilo mangintopot rirun, kapoam kalo mampalio ra mopongo makakito ra kaimuagan ondo' kasaa', kaimuagan ra kainduo mampalio ilo.

⁹Amon ru lakat poyo kalo masaga' ilo mangintopot rirun kabalu' pana nakakito noyo ra karuruo kaimuagan no, am kalo masaga' ilo mangining ra ragu muno, alap sanganu timug intor ra Sungoi Nil am pasasaro' ra tana'. Makulau timug no masauk ra raraa'.”

¹⁰Kaa' indagu i Musa ra TUHAN, “Iou TUHAN, pai' aku susubo'. Aku sala' ka ulun matanda' mindadagu, ragili am iou pana raino, kabalu' pana mindagu Kou noyo raki'. Kalo matanda' ra aku mindagu, malambayut mindagu am kalo masail ku toojo.”

¹¹Indagu boo TUHAN ri Musa, “Osoi kia mangani' ra ulun ra kabang? Osoi kia mopobobou kapoam mapabarat ra ulun? Osoi kia mapakito kapoam mopobolou ra ulun? Aku, TUHAN.

¹²Raino, ongoi noyo. Indanganon Tokou mindagu am mambala' rirun ra atan musiti' raguon muno.”

¹³Taam i Musa, “Iou TUHAN, makitaak aku susubo' noyo ulun ra bokon.”

¹⁴Sangit boo TUHAN ri Musa am indagu, “Ati kulaan nua' ru pagaka' muno i Arun, ulun ru Liwi no? Nakapandai Aku ra matanda' io mindagu. Sotopot no, tatanga' io mangkiralan mongoi ragiti, am maansukan io muma' rirun.

¹⁵Makapansunur kou riso, am mambala' riso atan ondo' musiti' raguon nano. Indanganon Ku akau ruo am mambala' ramuyun atan ondo' musiti' raguon am baalon.

¹⁶Mindagu io ra ulun raginilo ra tayar ru bala muno. Masauk io ra mindadagu muno, am masauk kou koson ri Aki Kapuuno' ondo' mambala' atan ondo' musiti' raguon nano.

¹⁷Ibito' jujuga' ti am pakayon mu mambaal ra kaimuagan.”

¹⁸Kopongo raginio saguli' i Musa ra baloi ri Jitro iwan nano ra ungkuyon. Indagu i Musa riso, “Iowo' aku no rumuli' ra pabukat-pabukat kuno giu' ra Misir, mongoi pagilong ru lakat poyo kia naayag ilo.” Nangiou i Jitro am pamintor ri Musa.

¹⁹Paat ra lakat poyo i Musa giu' ra Midian, indagu TUHAN riso, “Saguli' no giu' ra Misir sabap ra ngaangai' ulun ondo' masaga' mamatoi rirun minatoi noyo.”

²⁰Ginio ra nagibit i Musa ra andu' am anak-anak nano am posokoyo' no ilo ra kaladai am ongoi ra Misir. Inibit niayuk ri Musa jujuga' nano sumugut ra susuban ri Aki Kapuuno' riso.

²¹Indagu poyo TUHAN ri Musa, “Nangani' Aku noyo rirun ra kuasa' mambaal ra kaimuagan-kaimuagan. Ginio ra makasaboi kou ra Misir, baalo' ngaangai' kaimuagan ra saang ru raja' ru Misir. Kaa' mangkinibit Aku riso bambalingatan, saboi kalo makataak io ra ulun raginilo mugar.

²²Indagu ra raja' no ra Aku TUHAN mindagu koson ragitio, ‘Israil noyo anak katuaan Kuno.

²³Nanusub Aku noyo rirun ra makataak ra anak Kuno mugar maa' raginio makasamba io Raki', kaa' marara' kou. Raino potoyon Ku anak ungkuyon katuaan muno.’ ”

²⁴Giu' ra rondo' intok nangkiman, giu' ra tatanga' pangkiralanan mongoi ra Misir, ratong TUHAN ri Musa am kuminam mamatoi riso.

²⁵I Jipora andu' ri Musa, nangalap ra batu malarom am lomporo' no kungkung ra pompor ru tali' ru anak nano, am kama' ra kalayam[7] ri Musa ra linompor no. Indagu i Jipora, “Totopot okou noyo ralaki ondo' tatangan ra raraa' ra tayar kuno.”

²⁶Minindagu i Jipora koson raginio sabap ra kaulayan ru sunat no. Ginio ra kalo namatoi TUHAN ri Musa.

²⁷Liliwa' raginio indagu TUHAN ri Arun, “Ongoi noyo ra tana' kaagisan tuum ri Musa.” Ongoi boo tuum i Arun ri Musa giu' ra gunung matulai, alok i Arun riso.

²⁸Pambala' i Musa ri Arun ra ngaangai' rinagu ru TUHAN paat ra io sinusub rumuli' ra Misir. Pambala' niayuk i Musa ra ngaangai' baal kaimuagan ondo' musiti' baalon nano.

²⁹Ongoi boo i Musa am i Arun ra Misir, am patimungo' ngaangai' tingganai ru ulun ru Israil.

³⁰Pambala' i Arun risilo ra ngaangai' baal kaimuagan ondo' pinabala' ru TUHAN ri Musa, am mambaal i Musa ra kaimuagan ra saang ru ngaangai' ulun no.

³¹Mangintopot ilo, am igulatur samba paat ra nakaining ra nampalio TUHAN risilo am nakakito ra ngaangai' kaimbalaan nilo.