Read Timugon Murut KAINGKUALAN 6 Bible Online

KAINGKUALAN 6 - Timugon Murut bible

KAINGKUALAN 6

¹Indagu TUHAN ri Musa, “Raino makakito kou ra atan ondo' baalon Kuno ra raja' ru Misir. Jajalin Ku io mapaugar ra ulun Kuno. Sotopot no mampajajal Aku riso mapagiru' risilo mingkual intor ra pagun nano.”

²Indagu i Aki Kapuuno' ri Musa, “Aku noyo TUHAN.

³Minintalang Aku noyo ri Abragam, ri Isak am ri Jakub koson ra i Aki Kapuuno' Ondo' Maayo Kaga' Kuasa', kaa' kalo napaulig Aku risilo ra inggalan Kuno ondo' matulai, iono TUHAN.[8]

⁴Nambaal Aku niayuk ra bantu' risilo. Nambantu' Aku koson mangani' risilo ra tana' ru Kanaan, tana' inayanan nilo ra galing i koson ulun bansa' ru bokon.

⁵Naining ku noyo laa ru ulun ru Israil ondo' inulipon ru ulun ru Misir am nakara' Ku boo bantu' Kuli.

⁶Ginio ra balai' ulun ru Israil ra bala' Kuno risilo, ‘Aku noyo TUHAN; mapalabus Aku ramuyun intor ra pangulipanan ru ulun ru Misir. Mamakai Aku ra kuasa' Kuno ondo' maayo koson mamayag ramuyun am koson mangani' ra ulun ru Misir ra ukuman maagat.

⁷Mapasauk Aku ramuyun ra ulun Kuno galama', am masauk Aku ri Aki Kapuuno' min. Makapandai kau ra Aku noyo TUHAN i Aki Kapuuno' min, paat ra Aku mapalabus ramuyun intor ra pangulipanan ra pagun ru Misir.

⁸Magibit Aku ramuyun mongoi ra pagun ondo' binantu' Kuno ra ibot koson pataakon Ku ri Abragam, ri Isak am ri Jakub. Mapataak Aku ra tana' no ramuyun ra longgom min. Aku noyo TUHAN.’ ”

⁹Pinasaboi ri Musa ngaangai' bala' no ra ulun-ulun ru Israil no, kaa' marara' ilo mangining ra ragu-ragu nano, sabap ra pangulipanan ra malaat no nangkinibit risilo malawo guang.

¹⁰Indagu boo TUHAN ri Musa,

¹¹“Ongoi no tuum ra raja' ru Misir am raguo' ra moonsoi paugaron ulun-ulun ru Israil mangiruan ra pagun nano.”

¹²Kaa' taam i Musa, “Ulun-ulun ru Israil galama' marara' mangining ra ondo' raguon kuno, mulu' poyo raja' ru Misir. Mailo aku mindagu.”

¹³Kaa' indagu TUHAN ri Musa am i Arun, “Balai' noyo ulun-ulun ru Israil am raja' ru Misir ra nanusub Aku ramuyun koson maningganai ra ulun-ulun ru Israil no mingkual intor ra Misir.”

¹⁴Gitilo noyo papag ri Musa am i Arun: I Rubin anak ungkuyon katuaan ri Jakub makaanak ungkuyon apat ngaulun: I Ginok, Palu, Gijron am i Karmi. Ilo noyo kinamatuaan ru bansa'-bansa' ra bala ri Rubin.

¹⁵I Simion makaanak ungkuyon onom ngaulun: I Jimuil, Jamin, Ogad, Jakin, Jogar am niayuk i Saul anak ungkuyon intor ra sangulun ruandu' ru Kanaan. Ilo noyo kinamatuaan ru bansa'-bansa' ra bala ri Simion.

¹⁶I Liwi makaanak ungkuyon talu ngaulun: I Girson, Kigat am i Mirari. Ilo noyo kinamatuaan ru bansa'-bansa' ra bala ri Liwi. Naayag i Liwi buoi 137 ngambilor.

¹⁷I Girson makaanak ungkuyon ruo ngaulun: I Libni am i Simii; makapapag ilo ra masuang.

¹⁸I Kigat makaanak ungkuyon apat ngaulun: I Amram, Jijgar, Gibron am i Ujiil. Naayag i Kigat buoi 133 ngambilor.

¹⁹I Mirari makaanak ungkuyon ruo ngaulun: I Magli am i Musi. Ilo noyo bansa'-bansa' ralalom ru bansa' ru Liwi am papag ru sigagama'.

²⁰I Amram nagandu' ri Jokgibid, boborok ruandu' ru ama' nano; anak nilo iono i Arun am i Musa. Naayag i Amram buoi 137 ngambilor.

²¹I Jijgar makaanak ungkuyon talu ngaulun: I Kora, Nipig am i Jikri.

²²I Ujiil makaanak ungkuyon talu ngaulun niayuk: i Misail, Ilsapan am i Sitri.

²³I Arun nagandu' ri Ilisiba, anak ruandu' ri Aminadab; i Ilisiba pabukat ruandu' niayuk ri Nagason. Naganak i Ilisiba ri Nadab, Abigu, Iliajar am i Itamar.

²⁴I Kora makaanak ungkuyon talu ngaulun: I Asir, Ilkana am i Abiasap. Ilo noyo kinamatuaan ru sasambaloi ra bala ri Kora.

²⁵I Iliajar anak ungkuyon ri Arun nagandu' ra sangulun intor ra anak ruandu' ri Putiil. Anak nilo iono i Pinigas. Ilo noyo tingganai ru bansa' am tingganai ru sasambaloi ra bansa' ru Liwi.

²⁶I Arun am i Musa noyo ondo' sinusub ru TUHAN koson magibit ra ulun ru Israil mingkual intor ra Misir.

²⁷Ilo ruo noyo timinuum ra raja' ru Misir am makitaak ra raja' maa' raginio mapalabus ra ulun ru Israil.

²⁸Paat ra mindagu TUHAN ri Musa giu' ra pagun ru Misir,

²⁹indagu TUHAN, “Aku noyo TUHAN. Pambala' ra raja' ru Misir ra ngaangai' rinagu Kuno rirun.”

³⁰Kaa' indagu i Musa, “Nakapandai Kou ra kalo matanda' aku mindagu. Masaga' kia nua' lair raja' no mangining ra ondo' raguon kuno?”