Read Timugon Murut AYUP 17 Bible Online

AYUP 17 - Timugon Murut bible

AYUP 17

¹Patayan kuno maar noyo, maar maukat painawo kuno; kolondo' boo atan-atan ondo' ak am lobong kuno.

²Saukon aku ru ulun ra pagasaban. Nakito kuno ra mapara' piboo laat ra ilo mindagu ra pangiisan.

³Aku ti mabanis guang, iou Aki Kapuuno'. Pangintopot no raki'. Kolondo' osoi pana boo ondo' mangiou ra ragu kuno.

⁴Tinauban Mu guang nilo saboi kalo mangarati'; pai' polosoo' ilo mangala raki'.

⁵Sumugut ra ragu amsal, osoi ayuk manumbalik ra rangan sabap ra makimauli', anak nano galama' makaapu ra pambalos.[23]

⁶Raino iniis aku ra ragu amsal no; minatong ilo am nantiwog ra bulos kuno.

⁷Mato kuno majapul sabap ra mangiluk guang; ngaangai' ru inan kuno matukal ra mangkagas.

⁸Ulun ondo' mapasau guang, makatigog am mangimuag; mangkara' ilo raki' koson ra ulun ondo' kalo mangintopot ri Aki Kapuuno'.

⁹Ulun ondo' moonsoi am kolondo' sala, gumaai mangintopot ra i Aki Kapuuno' mangiou risilo.

¹⁰Kaa' amon ru akau ngaangai' matong ragiti, kolondo' sangulun mapintar pana matuum kuno.

¹¹Orou-orou kuno nakasail noyo, kalo nakasugut ngaangai' inatangan kuno; kalio noyo boo ngaangai' kalansanan kuno.

¹²Kaa' rangan-rangan kuno mindagu, ‘Rondom no matawang am sinda maar makasaboi.’ Kaa' nakapandai aku ralalom ru guang kuno ra magulayun aku ra intok molondom.

¹³Intok ru ulun minatoi ayuk kalansanan kuno, giu' no mombolong aku ralalom kalandaman.

¹⁴Inggalanin ku lobong ra ‘ama' kuno’, am lingguang ondo' mangakan ra inan kuno sabiton ku ra ‘ina' kuno’ am ‘pabukat ku ra ruandu'’.

¹⁵Ati kia kalansanan ra tayar kuno? Osoi kia ondo' makakito ra kalansanan ra tayar kuno?

¹⁶Kolondo' boo kalansanan kuno paat ra aku mongoi ra intok ru ulun minatoi.