Read Timugon Murut AYUP 2 Bible Online

AYUP 2 - Timugon Murut bible

AYUP 2

¹Ilo ondo' giu' ra suruga' minatong poyo ra saang ru TUHAN, am i Manusuk pana siminaang nababaya' risilo.

²Pangkuot TUHAN ri Manusuk, “Ati intor muno?” Taam i Manusuk, “Timinanggau aku ra ati-ati am minongoi ra titikop ru tana' ti.”

³Indagu TUHAN, “Inurio mu kia i Ayup, ulun ondo' nangandoi ayuk Raki'? Giti ra titikop ru tana' ti kolondo' ulun ondo' totopot gumagaya' am moonsoi koson riso. Sumambayang io Raki' am ilalain no toojo maa' raginio kalo mambaal ra malaat. Nanusuk kou Raki' maa' raginio mangiou rirun mampajamar riso ra kolondo' sasaban, kaa' lakat poyo gumagaya' i Ayup Raki'.”

⁴Taam i Manusuk, “Ulun masaga' mapataak ra ngaangai' longgom nilo maa' raginio makatanduus kaayagan.

⁵Kaa' amon ru rualin Mu inan nano, maaru' magulas io Rirun ra saang Muno.”

⁶Indagu boo TUHAN ri Manusuk, “Iou noyo, baalo' atan ayuk riso, ondo' ak am kalo potoyon mu io.”

⁷Kopongo raginio i Manusuk nangiruan ra TUHAN, am naparatong ra talipos ri Ayup intor ra pampalar ru kalayam saboi ra taur ru ulu nano.

⁸Minongoi i Ayup panturung giu' ra sapapa' ru tinuntur ra ginsamol liliwa' nangaur ra talipos nano ra rondo' poto ru rarapu'.

⁹Kon ru andu' nano riso, “Kua lakat kou po gumagaya' ri Aki Kapuuno'? Pagulas no ri Aki Kapuuno', am patoi no!”

¹⁰Taam i Ayup, “Okou mindagu koson ra ulun sasambungon. Paat ri Aki Kapuuno' nangani' ra ondo' moonsoi, inapu takau. Itakau niayuk musiti' mangapu ra ondo' kalo moonsoi.” Kabalu' pana naimbolo' i Ayup, kalo mindagu io ra ragu-ragu ondo' manggal ri Aki Kapuuno'.

¹¹Talu ngaulun rangan ri Ayup iono i Ialipas intor ra bandar Timan, i Bildad intor ra pagun Sua, am i Jopar intor ra pagun Naama nokorongog intor ra kaimbalaan ri Ayup. Ilo pana namatas boo koson tumimung am mongoi panimayo ri Ayup.

¹²Paat ra ilo lakat poyo intor ra maalur, nakakito ilo ri Ayup, kaa' kalo nakaulig riso. Pakaliman ilo ra ulun no i Ayup, nantangi' ilo ra bolos matangil. Rinilak nilo bayang sabap ra mangiluk guang, am nampatauk ra kaau ra rasawat am ra ulu nilo.

¹³Ilo pana panturung boo ra tana' nababaya' ri Ayup buoi katuluan ra orou am katuluan ra rondom ra kalo mindagu ra rondo' ragu pana sabap ra nakapandai ilo ra mapara' bagat ru kaimbalaan ri Ayup.