Read Timugon Murut AYUP 22 Bible Online

AYUP 22 - Timugon Murut bible

AYUP 22

¹Kopongo raginio indagu i Ialipas,

²“Gino ngai' ulun, kolondo' ondo' mokoonong ra tayar ri Aki Kapuuno'. Ulun ondo' mapintar pana kaga' kolondo' onong ra tayar Nano.

³Atan kia onong no ra tayar ru Io Ondo' Maayo Kaga' kuasa', amon ru mambaal kou ra kasagaan Nano? Mokoondo' kia ampos no Riso amon ru bayag muno moonsoi kaga'?

⁴Sala' ka sabap no malaa' kou am mangurumat ri Aki Kapuuno', am Io pana mansawai am mangakim rirun,

⁵sabap ayuk ra tula muno masuang, am malaat kou kaga'.

⁶Koson mampajajal ra pabukat muno mambayar ra utang nano, ginaau mu bayang nano am pinoloso io nagibabaang.

⁷Marara' kou mangani' ra timug risilo ondo' naagui, am marara' mangani' ra akanon risilo ondo' naitilan.

⁸Pinakai mu kuasa' am pangkat muno koson mampagaau ra ngaangai' tana'.

⁹Sala' ka ayuk marara' kou mangindangan ra ruandu' napuor, kaa' okou niayuk nangimbolo' ra anak nailusan ra matuo.

¹⁰Ginio ra raino mokoondo' pamalandak ra liput muno, am pulali' ru malaa' malimanan muno.

¹¹Matawang masauk ra molondom saboi okou kalo makakito, am sinakob kou ru liur ondo' makalalaa'.

¹²Kalo kia minayan i Aki Kapuuno' giu' ra suruga' ondo' masawat kaga', am maginduku' ra ragana', ra butitin-butitin ondo' masawat kaga'?

¹³Kaa' mangkuot kou, ‘Nakapandai kia i Aki Kapuuno'? Giu' Io ra sapapa' ru gaun am kalo makapangakim ritakau.’

¹⁴Indoson mu ra pagilayan Nano sinilian ru gaun, paat Io mugar giu' ra balitan ru limbowon am tana' ti.[28]

¹⁵Maya' kou kia rayus ra ralan ondo' masalok bayaan ru ulun malaat?

¹⁶Kabalu' pana kalo poyo nasaboi paat nilo, inabas ilo ru liur ondo' matong.

¹⁷Ginio noyo ulun ondo' nangimpai ri Aki Kapuuno', am mangkara' ra Io Ondo' Maayo Kaga' Kuasa' kalo mambaal ra atan-atan risilo.

¹⁸Kaa' i Aki Kapuuno' ondo' nampasauk risilo ra langkaya'. Kalo makarati' aku ra pangkaraan ru ulun malaat.

¹⁹Ulun moonsoi am ondo' kolondo' sala makakurit ra maansukan, paat makakito ra ulun malaat mangapu ra ukuman.

²⁰Ngaangai' longgom ru ulun malaat napuso, am apui monolob ra ngaangai' ondo' natatang.

²¹Raino, Ayup, pobonsoi no ri Aki Kapuuno', am langgai' noyo mangkara' Riso koson ra pantula'. Amon ru mambaal kou koon raginio, barakaton No okou.

²²Apuo' noyo susuban ondo' tinaakan Nano; bulii' noyo ragu Nano ralalom ru guang muno.

²³Musiti' kou sumaguli' ri Aki Kapuuno' ra guang minggana',[29] am ngaangai' kalaatan giu' ra baloi muno musiti' pupusin mu.

²⁴Patiri' mas muno ondo' kopoyo toojo; patiri' mas muno ra lonor ru sungoi ondo' kolondo' boo timug.

²⁵Musiti' i Aki Kapuuno' Ondo' Maayo Kaga' kuasa' noyo mas muno, am pirok ondo' moonsoi kaga'.

²⁶Bagu no mangintopot kou ri Aki Kapuuno' ra masalok, am makapandai ra Io noyo puun ru kaansukan muno.

²⁷Paat ra okou makiasi', tumaam Io, am masugut mu ngaangai' bantu' muno.

²⁸Pirot muno masalok masugut, am sinda mampatawang ra bayag muno.

²⁹Ulun ondo' lumimbau paingganaan ri Aki Kapuuno', kaa' ondo' minggana' guang bayagon No.

³⁰Mamayag Io Rirun amon ru kolondo' sala muno,[30] am amon ru mambaal kou ra kasagaan Nano.”