Read Timugon Murut AYUP 3 Bible Online

AYUP 3 - Timugon Murut bible

AYUP 3

¹Pupus no, tumalimpuun i Ayup mindagu am magulas ra orou io inanak am mindagu,

²“Iou Aki Kapuuno', ulaso' noyo orou ra aku inanak, am ulaso' noyo rondom ra aku tumalimpuun tininai'.

⁴Iou Aki Kapuuno', sauko' noyo orou raginio molondom, luluo' orou raginio intor ra pangkaraan Muno; pai' Mu noyo polosoo' sinda mapaang makatampulau.

⁵Sauko' noyo orou raginio malaut, am matikop ru kalandaman; taubi' orou raginio ra gaun, am silii' sinda mato ru orou.

⁶Polosoon noyo rondom raginio pusoon intor ra panguntaban ra bilor am sila'.

⁷Polosoon rondom raginio matikop ru kalandaman, kolondo' kaansukan, kolondo' bolos magigindii.

⁸Akau ulun mapandai kaga' ra sihir, ulun mapandai kaga' ra Liwiatan,[5] ulaso' noyo orou raginio ra ibot am ulas.

⁹Pai' polosoo' butitin ru susuab ti suminda; pai' polosoo' sinda ru tumawang sumirang.

¹⁰Ulaso' noyo rondom raginio sabap ra nompoloso raki' inanak, am nampataak raki' ra kapaganan am kangilukan.

¹¹Kua kia kalo minatoi aku ralalom binunakan ri ina'? Kua kia kalo minatoi aku paat ra inanak?

¹²Kua kia ganggali' aku ri ina' am kinubibil no? Kua kia patitio' aku ra titi' nano?

¹³Amon ru paat raginio minatoi aku, maaru' paat ragitio makatangus aku,

¹⁴mombolong koson ra raja' am ulun-ulun mamarinta ondo' nambaal saguli' ra istana nakalair kaga'.

¹⁵Maaru' mokororot aku koson ra anak ungkuyon ru raja' ondo' nanuang ra baloi nilo ra pirok am mas.

¹⁶Kua kia kalo narayus aku minatoi ra inanak, nongorom ra mato koson ra lalagang ondo' minatoi?

¹⁷Giu' ra ralalom ru lobong, ulun malaat lumonggo' mambaal ra malaat, am ulun mangngandoi ondo' naagui mapaabus ra bagui.

¹⁸Ulun inaput pana makasia' ra katangusan, makalabus intor ra susuban makuliga' am galakin.

¹⁹Ulun nauligan kaga' inggalan kapoam kalo, ngaangai' no ra giu' no, am ulipon makaalap ra kalabusan ra pupus no.

²⁰Kua kia ra ulun polosoon marayus maayag ra maimbolo'? Kua kia ra ulun ondo' mangiluk aniin ra sinda?

²¹Maginaa ilo ra kapatayan, kaa' kapatayan kalo matong; masaga' ilo poyo ra lobong ka intor ra atan ayuk rapu'.

²²Kaansukan malimanan ayuk paat ra ilo matoi am lobongon.

²³Pinasibuni ri Aki Kapuuno' orou matong nilo, am nagawang risilo intor ra ngaangai' intok.

²⁴Koson palit ru akanon, mampalaa aku, kalo lumonggo' aku mompoloong.

²⁵Ngaangai' ondo' kalaanin kuno lumumpa' raki'; ngaangai' ondo' makaimamang raki' lumumpa' raki'.

²⁶Kolondo' karandanan kuno, am kapaganan kuno kolondo' pupus.”