Read Timugon Murut AYUP 33 Bible Online

AYUP 33 - Timugon Murut bible

AYUP 33

¹Raino okou Ayup, rongogo' toojo, ngaangai' ondo' raguon kutu.

²Nakatampos aku no koson mambala' ra pampaguangan kuno.

³Mabaya' ra kabanisan ru guang mindagu aku; ondo' raguon kuno am ondo' sotopot no.

⁴Ambiluo ri Aki Kapuuno' namangun raki', am paminawo ru Io Ondo' Maayo kaga' Kuasa' mampakaayag raki'.

⁵Amon ru maalap, taamo' aku. Tampos no ra mindagu.

⁶Ra tayar ri Aki Kapuuno', akau am aku kalo nansusuai; intor ra tana' lia' itakau binaal No.

⁷Ginio ra, kalo pana malaa' kau raki'; kolondo' ra guang kuno mangala ramuyun.

⁸Gitio noyo norongog kuno ra akau mindagu,

⁹‘Kolondo' pilat kuno, am kalo nambaal ra kasalaan. Kolondo' sala kuno, am kalo minanggal.

¹⁰Kaa' naguyum i Aki Kapuuno' ra sasaban koson mamulunsar raki', am kinara' aku koson ra pantula'.

¹¹Rinantai No kalayam kuno; tainuin No ngaangai' kisol kuno.’

¹²Okou Ayup, pampaguangan muno totopot sala. I Aki Kapuuno' maayo poyo intor ra ulun.

¹³Kua panguu' kou ri Aki Kapuuno' am mindagu ra kalo igondo' Io taam ra paraguon ru ulun?

¹⁴Kabalu' pana mindagu i Aki Kapuuno' ra masuang ralan, kolondo' osoi pana ondo' totopot mampalio ra ragu Nano.

¹⁵Mindagu i Aki Kapuuno' pinaaya' ra inupi am pinaintalang, paat ra ulun mombolong ra rondom ti.

¹⁶Binuir ilo ri Aki Kapuuno' maa' raginio rumongog Riso, am nampakalalaa' risilo ra pampakaraan Nano.

¹⁷Mindagu i Aki Kapuuno' maa' raginio lumonggo' ilo mambaal ra tula, am mangiruan ra kalimbawan nilo.

¹⁸Kalo mompoloso Io risilo pusoon; mamayag Io risilo intor ra kapatayan.

¹⁹Mansawai i Aki Kapuuno' ra ulun paayaan ra maruol saboi inan nilo maruol kaga'.

²⁰Ulun ondo' marualan kalo matiakan; akanon ondo' maamis pana maninggol.

²¹Inan nilo tumukal; makito ngai' bungul nilo.

²²Mamaar ilo no makasaboi ra intok ru ulun minatoi; mamaar ilo noyo ra tana' ru ulun minatoi.

²³Maaru' lair rondo' intor ra saribu malaikat ri Aki Kapuuno', malaikat ondo' mampakara' ra sasangulun ra kandoi nano, matong mangindangan riso.

²⁴Malaikat no ra makaasi' mindagu ra, ‘Palabuso' io maa' raginio kalo mongoi io ra tana' ru ulun minatoi. Gitio noyo pamumuli' koson mampalabus riso.’

²⁵Inan nano masauk ra maikang kaga', maikang koson ra ulun mamulok.

²⁶Iowon ri Aki Kapuuno' kitaakon nano paat ra io makiasi'; sambaan no i Aki Kapuuno' ra maansukan, am tapulion ri Aki Kapuuno' baal nano.

²⁷Giu' boo ra saang ru ulun masuang mindagu io, ‘Makatula aku noyo. Makasala aku noyo, kaa' mangampun i Aki Kapuuno' raki'.

²⁸Kalo mompoloso Io raki' mongoi ra tana' ru ulun minatoi, am lakat aku poyo maayag saboi raino.’

²⁹Ruruli' noyo, i Aki Kapuuno' nambaal ra ngaangai' ti

³⁰maa' raginio makapamayag Io ra ulun, am mangani' ra kaansukan ralalom ru kaayagan nilo.

³¹Raino, okou Ayup, talinaasi' toojo, roro' no am polosoo' aku mindagu.

³²Kaa' amon ru mokoondo' ondo' masaga' muno raguon, indagu ayuk. Masaga' aku mangkirongog am mangiou ra okou motopot.

³³Kaa' amon ru kalo, roro' no am rongog no raki'; masaga' aku mangila' ra kapintaran rirun.