Read Timugon Murut AYUP 37 Bible Online

AYUP 37 - Timugon Murut bible

AYUP 37

¹Angin mapuor kaga' mokotontol raki'; pusu' kuno mimbuor ra maribok.

²Akau ngaangai' no, rongogo' bolos ri Aki Kapuuno', rongogo' tingkalur ondo' mingkual intor ra kabang Nano.

³Giu' ra titikop ru limbowon, pinatangkus No ganit; giu' ra pompor-pompor ru tana', inataran No timpalak.

⁴Kopongo raginio morongog bolos Nano ngongoos, am ra bolos mosongou maningkalur ra matutunggul; am liliwa' bolos Nano morongog ganit ra matutunggul ra kolondo' makaputat.

⁵Nabaya' ra susuban ri Aki Kapuuno', baal makaimuag nasauk, baal ra maayo ondo' kalo maratian takau.

⁶Ais rumatu' ra tana' ti sumugut ra susuban Nano, am rasam maawas rumatu' sumugut ra susuban Nano.

⁷Nompolonggo' Io ra kandoi ru ulun, maa' raginio makapandai ilo ra atan ondo' baalon Nano.

⁸Bibiag masigo sumubol ra ralalom ru luang batu, am sumindung giu' ra luang intok nano.

⁹Bagiu' mapuor matong intor ra rabugus, am angin masimu' kaga' matong intor ra ralayo.

¹⁰Paminawo ri Aki Kapuuno' mompokotog ra ralimbou ru timug ondo' malangka', am kulawon ginio masauk ra ais ondo' mokotog.

¹¹Sinuangan No gaun ra timug, am makasinda gaun sabap ra natampulau ru ganit.

¹²Gaun minsir-insir ra titikop ru tana' ti, am mambaal ra ngaangai' susuban ri Aki Kapuuno'.

¹³Namparatu' i Aki Kapuuno' ra rasam koson mamasa' ra tana' ti, kapoam koson mangukum ra ulun, kapoam koson manulu' ra taak Nano.

¹⁴Okou Ayup, pongkoror no, am rongog no, urioo' toojo baal-baal maayo ondo' binaal ri Aki Kapuuno'.

¹⁵Nakapandai kou kia ati kulaan i Aki Kapuuno' nanusub am nambaal ra ganit mapaang intor ra gaun?

¹⁶Nakapandai kou kia ati kulaan ru gaun minsir, ampos ru binaal ri Aki Kapuuno' ondo' makapandai kaga'?

¹⁷Kalo, mampalaa kou ayuk ra malasuan paat ra tana' ti malumpa' ra angin ru rabugus.

¹⁸Maindangan mu kia i Aki Kapuuno' mamingkal ra limbowon, am mampasauk riso ra mokotog koson ra acuan ru basi'?

¹⁹Pangila' no ramon atan ondo' musiti' mai paraguon ri Aki Kapuuno'; kolondo' atan-atan ra pangkaraan mai am kolondo' atan-atan maragu mai.

²⁰Marara' aku makitaak koson mindagu ri Aki Kapuuno'; tawa ru Io lair ondo' mangalap ra kaluagan koson mamuso raki'.

²¹Raino sinda giu' ra limbowon mapaang kaga' saboi mobolou mato, am limbowon pana mapasau ru angin mansiob.

²²Sinda kinasilou ru mas makito intor ra ralayo, am katulayan ri Aki Kapuuno' makaansuk ra guang takau.

²³Totopot maayo kuasa' ri Aki Kapuuno' saboi itakau kalo makainggaar Riso; Io mabanis guang am matimpok ra ulun.

²⁴Ginio sabap ra moonong ulun mangurumat ri Aki Kapuuno', am ulun ondo' mangiou ra io no mapintar kalo lioon No.”