Read Timugon Murut AYUP 39 Bible Online

AYUP 39 - Timugon Murut bible

AYUP 39

¹Nakapandai kou kia ra jam ru kambing gunung anakon ru indung nano? Igondo' kou kia pakakito ra tambang masigo maganak ra anak nano?

²Nakapandai kou kia ra buoi ru kambing am tambang makatinai'? Nakapandai kou kia ra jam ru anak nano anakon?

³Nakapandai kou kia ra jam ru bibiag no magupu', am maganak ra anak?

⁴Anak ru bibiag gumayo am masauk maikang giu' ra kataunan; am mugar ra maalur am kalo sumaguli' ra indung nano.

⁵Osoi kia ondo' mampalabus ra kaladai masigo? Osoi kia ondo' mampalabus am mompoloso ra kaladai masigo masisimbul?

⁶Aku noyo ondo' mangani' ra tana' kaagisan ra kaladai masigo koson intok randanan nano, am padang ru usi' koson intok ayanan nano.

⁷Kaladai masigo minggalur ra bandar ondo' masuang ginia', am kalo babaya' makaup koson mambaal ra kandoi.

⁸Padang ru sakot giu' ra gunung iono intok ru akanon nano, giu' no tutuu' masansam uyumon nano.

⁹Masaga' kia sapi' masigo mangandoi rirun, kapoam masaga' mombolong ra rondom giu' ra ralalom ru kandang panambiagan muno?

¹⁰Mabangkil kia sapi' masigo am jajalin mamparadu' ra tayar muno, kapoam pakayon koson manisir ra umo muno?

¹¹Malansanan mu kia ikang ru sapi' masigo ondo' maikang am lumansan riso mambaal ra kandoi muno ra maagat?

¹²Malansan kou kia ra sapi' masigo koson manimung ra kumoson, am magibit ra ampos ru tinanom muno mongoi ra intok pangagikan?

¹³Maribok kaga' kulatab ru kawo ru susuit unta! Kaa' susuit unta kalo makasiab koson ra susuit kanawai.

¹⁴Susuit unta mantalu' giu' ra tana' am iruanin no, am agis mampalasu' ra talu' nano.

¹⁵Susuit unta kalo makaliman ra maaru' lair ulun makakinjang ra talu' nano, kapoam bibiag masigo mamabak ra talu' nano.

¹⁶Susuit unta mitambingai koson ra talu' nano sala' ka io tangan, am kalo mampalio ra pirot nano totopot kolondo' onong.

¹⁷Aku noyo ondo' nambaal ra susuit unta sasambungon am kolondo' karatian, am kalo nangani' Aku riso ra kapintaran am malarom utok.

¹⁸Kaa' paat ra susuit unta masimbul ra maribok kaga', kuda am ulun mangura' nano pana maala.

¹⁹Okou Ayup, okou noyo kia nangani' ra kaikangan ra kuda, am nampasauk ra bulu maawar ondo' lalamboi ra impus nano?

²⁰Okou kia ondo' manusub ra kuda tumindak koson ra gapu' am ra angus ru paminawo nano mangilaa' ra ulun?

²¹Insokon ru kuda tana' giu' ra limayak ra maansukan, am jumanjang mongoi ra intok ru pamulunsaran ra makai' ikang.

²²Kuda kalo makarati' ra malaa', am kalo makalugut ra ilang.

²³Kinandoi ondo' inibit ru ulun nangura' nano mangurinsil am manguliat natiu' ru sinda.

²⁴Mabaya' ra ikang ondo' sumimbuluk masimbul kuda, am kalo migor ra mororo' paat mokobolos ru bujung.

²⁵Angus-angus kuda moonong samputin bujung; intor ra maalur maalok no owou ru pangayawan, am morongog no ulun tutumula' gumolok ra manusub.

²⁶Intor kia rirun susuit kanui minigigila' ra mansiab, paat sumuku' ra rabugus ra kawo nakambal?

²⁷Maginaa kia susuit kanui ra susuban muno koson mambaal ra bunsut nano giu' ra gunung ondo' masawat?

²⁸Giu' ra rasawat ru gunung batu ondo' masawat kaga' nambaal susuit kanui ra intok ayanan nano, am nampasauk ra ondo' manius koson ra kubu nano.

²⁹Intor ra giu' no susuit kanui magalung ra ngaangai' intok, mato nano magilong maguyum ra ondo' potoyon.

³⁰Giu' ra intok ondo' mokoondo' ra baangkai, giu' no susuit kanui tumimung; am anak-anak ru kanui manginum ra raraa' ru ondo' pinatoi no.