Read Timugon Murut AYUP 40 Bible Online

AYUP 40 - Timugon Murut bible

AYUP 40

¹Ayup, manggal kou ri Aki Kapuuno' Ondo' Maayo Kaga' Kuasa'; masaga' kou kia makiala, kapoam masaga' kou kia mansang?

³Taam boo i Ayup ra TUHAN,

⁴“Minindagu aku koson ra ulun sasambungon, iou TUHAN. Taam ra atan kia ondo' pataakon kuno? Kolondo' boo ondo' masaga' kuno paraguon.

⁵Minindagu aku nasailan intor ra sotopot no.”

⁶Kopongo raginio intor ra bagiu', indagu poyo TUHAN ri Ayup,

⁷“Raino imbuor no koson ra ungkuyon, am taamo' noyo kuatin-kuatin Kutu.

⁸Kuminam kou kia mapainono' ra Aku kalo matimpok, am mononsol Raki' ra mangiou rirun?

⁹Maikang kou kia koson Raki'? Maalap kia bolos muno maningkalur koson ra kinapuor ru bolos Kuno?

¹⁰Amon ru koon raginio, luat no ra matanda' am maligag kaga'; pasulungo' ra inan muno urumat am katulayan.

¹¹Ilai' toojo ulun ondo' lumimbau; paabuso' sangit muno am pagasab no risilo.

¹²Iou, tantangi' noyo ulun ondo' lumimbau am pakukuo' ilo; umoko' noyo ulun malaat raino niayuk.

¹³Lobongo' ilo ngaangai' giu' ra ralalom ru tana'; aputo' ilo giu' ra tana' ru ulun minatoi.

¹⁴Okou pana omporon Ku boo, sabap ra namanang kono ra pirot muno galama'.

¹⁵Ilai' toojo i Bigimot,[51] maayo ulun no, ondo' niayuk inangun Kuno, koson rirun. I Bigimot mongkotop ra sakot koson ra sapi',

¹⁶kaa' ilai' noyo toojo ikang ru inan nano, am kaikangan ru kual nano.

¹⁷Iku' nano tolorog koson ra puun ru sidar, am kual ra kalayam nano malanut kaga'.

¹⁸Bungul nano maikang koson ra tambaga', am kalayam nano koson ra batang ru basi'.

¹⁹Ginio noyo ondo' maayag ondo' makaimuag kaga' ra gino ngai' ru inangun ri Aki Kapuuno'. I Bigimot maalap ayuk kaala ru Namangun riso no.

²⁰Giu' ra gunung intok ru bibiag masigo mangkuli, sakot tumuu' koson mangani' riso ra akanon.

²¹Io ondo' maayag no lumuya' giu' ra saau ru bulungkut makaruui, am mansibuni giu' ra masuang galaga giu' ra intok makatimug.

²²Bulungkut makaruui am puun gandarusa giu' ra kiing ru sungoi boborok am mangani' riso ra sindungan.

²³Aug ru Sungoi Jordan ondo' maaug kalo malaa' io, timug ondo' makatiu' ra bulos nano umaan no ra guang mamaan.

²⁴Osoi kia mokobolou ra mato nano, am mamparakop riso ra landakon jujubak nano?