Read Timugon Murut AYUP 5 Bible Online

AYUP 5 - Timugon Murut bible

AYUP 5

¹Golok no, Ayup. Mokoondo' kia osoi ayuk makataam? Mokoondo' kia malaikat ondo' pakiindanganan muno?

²Ulun sasambungon matoi sabap ra maruol guang, ulun iisan matoi sabap ra mangusolon.

³Igondo' aku pakakito ra ulun sasambungon ondo' ilain ra moonsoi kaayagan, kaa' pulali' ku nagulas ra intok ayanan nilo.

⁴Anak nilo kalo mabayag; kolondo' ulun manaung risilo giu' ra makama.

⁵Ulun ondo' maitilan mangakan ra ampos tinanom ru ulun sasambungon am poyo gandum ondo' giu' ra tatanga' ru bulungkut; am ulun ondo' paason ra rapu' mompogogot ra kalangkayaan ru ulun sasambungon.

⁶Kalaatan kalo sumalula' intor ra tana', kapaganan kalo mujak intor ra tana' ti.

⁷Ulun galama' noyo ondo' namparatong ra kapaganan ra inan nilo, koson ra panjut ondo' mansiab intor ra apui.[8]

⁸Amon ru soroi aku ralalom ru baal mino, gumolok aku ri Aki Kapuuno', Io no pakisaungan kuno, am pataakon baal kuno.

⁹Kalo makarati' takau ra binaal maayo ri Aki Kapuuno', am kaimuagan Nano kalo mauntob.

¹⁰Rinasam No tana' am nanguas ra umo saboi maasa'.

¹¹Topot i Aki Kapuuno' ondo' napainsawat ra ulun musikin, am napakaansuk ra ulun mapagon.

¹²Jinajou No inatangan ru ulun mamparuung, am nampalandak ra ulun mapintar, saboi ilo malandak ru pampaguangan nilo galama' am ngaangai' pirot nilo kalo nasugut.

¹⁴Paat ra matawang nalumpa' ilo ru kalandaman, saboi matukangkam koson ra paat molondom.

¹⁵Kaa' namayag i Aki Kapuuno' ra ulun musikin intor ra kapatayan, am ulun mapagon intor ra pangimbalaan.

¹⁶Nangani' Io ra kalansanan ra ulun musikin, am nangimut ra kabang ru kolondo' katimpakan.

¹⁷Pakaansuk noyo ulun ondo' sinawai ri Aki Kapuuno'! Pai' pangkaus amon ru okou ilaan No.

¹⁸Kabalu' pana rualin kou ri Aki Kapuuno', babason No okou; kalindu' Nano ondo' mamilat, kalindu' Nano niayuk ondo' mamabas.

¹⁹Amon karaat makapatoi rirun, masalok Io mamayag rirun.

²⁰Magalung Io rirun paat ra bitilan, am mangampin rirun intor ra kapatayan paat ra pampatayan.

²¹Mamayag i Aki Kapuuno' rirun intor ra abau am simbaalin ra ragu; mamayag Io rirun paat ra kapusaan matong.

²²Paat ra kapukaan am bitilan lumumpa', maikang kou am makakurit poyo boo. Kalo malaa' am magalabo kou makauma' ra bibiag masigo ondo' masangit.

²³Umo ondo' raduon muno kolondo' batu, am bibiag masigo kalo mamulunsar rirun.

²⁴Kaayagan muno moonsoi giu' ra ralalom ru kim muno; paat ra okou manguntob ra domba muno, ngaangai' no soroi.

²⁵Mokoondo' kou ra masuang papag, koson ra kinasuang ru sakot giu' ra intok pangkatapan.

²⁶Koson ra gandum naansak kumoson ra bulintok nano, maayag kou saboi matutuo.

²⁷Ayup, ngaangai' no inintutun mai am motopot. Ginio ra, apuo' noyo sabap ra motopot baal raginio.