Read Timugon Murut AYUP 7 Bible Online

AYUP 7 - Timugon Murut bible

AYUP 7

¹Kaayagan ru ulun no koson ra kandoi pajajalin; kaayagan nano mapagon koson ra kaayagan ru kuli',

²koson ra ulipon ondo' moondom ra intok sindungan; koson ra mangngandoi ondo' maginaa ra gaji'.

³Sila' ka sila' kaayagan kuno kolondo' kuayan; moonong rondom aku mangiluk.

⁴Paat ra aku mombolong, jam mugar ra inuton ayuk; moondom aku ra tumawang am mantabubuir mombolong sorondom.

⁵Ngaangai' inan kutu mokoondo' ra lingguang am kogom; kungkung kuno napilat am nampunana'.

⁶Kaayagan kutu minsir ra kolondo' kalansanan, minsir ra maribok poyo intor ra ulun mampaugar ra misin pampagulung ra banang.

⁷Karaa' noyo, iou Aki Kapuuno', kaayagan kuno koson ra kaabusan ru paminawo; kaansukan kuno pupusin ra kolondo' babaya'.

⁸Makito Mu aku raino, kaa' kalo boo makito Mu aku. Amon ru maagu no maguyum Kou raki', kalio aku boo.

⁹Koson ra gaun majuut ondo' maluuk am lumiot, ulun matoi am kalo boo sumaguli'; ngaangai' ulun ondo' makaulig risilo kalo boo mangkara' risilo.

¹¹Kalo! Mailo aku mongkoror. Guang sumangit am maruol guang mailo ku oroton. Musiti' ku gaalon kabang, am mampaabus ra suang ru guang kuno.

¹²Kua tainui' Mu aku? Makapatoi kia aku ti koson ra tambuakal ru raat?[10]

¹³Lumuya' aku am kuminam tumangus koson mampaabus ra maruol kuno.

¹⁴Kaa' nampalalaa' Kou raki' ra inupi, am ilaanon Mu aku ra pinaintalang,

¹⁵saboi maansayan aku poyo sikakon am matoi intor ra maayag ralalom ru inan nakai' ra imbolo' ti.

¹⁶Nasuraan aku maayag; moogot aku matoi. Polosoo' aku no sabap ra kaayagan kuti kolondo' boo onong.

¹⁷Kua kia maatang kaga' ulun no Rirun? Kua kia masalok Kou mampalampit risilo?

¹⁸Imumuyin Mu ulun ra moonong susuab ti, am mangkinam risilo ra moonong jam.

¹⁹Kalo kia makapagilong sala' Kou raki' maa' raginio sumimbat aku monolon ra tiwog?

²⁰Okou Magagalung raki', marualan Kou kia ra tula kuno? Kua pamakai Kou ra inan kuno koson ra intok tiwon Muno? Aku ti saanin maayo Mu kia?

²¹Kalo kia ampunon Mu tula kuno? Kalo kia ampunon Mu sala kuno? Kalo boo mabuoi paribontoi aku giu' ra lobong, am kalio aku boo paat ra Okou maguyum raki'.