Read Timugon Murut AYUP 8 Bible Online

AYUP 8 - Timugon Murut bible

AYUP 8

¹Kopongo raginio indagu i Bildad intor ra pagun Sua,

²“Kula' poyo buoi muno mindagu koon raginio? Koson ra bolos ru angin ayuk ragu-ragu muno.

³Kalo igondo' i Aki Kapuuno' nampajajou ra katimpakan; kalo igondo' Io kaputat mambaal ra baal ondo' moonsoi.

⁴Anak-anak muno maaru' makatula noyo ri Aki Kapuuno', maaya' noyo ra ilo inukum Nano.

⁵Kaa' raino saguli' no ri Aki Kapuuno', am pakimasi' no Riso Ondo' Maayo Kaga' Kuasa'.

⁶Amon ru totopot mabanis guang muno, matong i Aki Kapuuno' am mangindangan rirun am niayuk tapulion sasambaloi muno koson ra pambalos rirun.

⁷Ngaangai' kalangkayaan muno ondo' kalio no kolondo' onong, amon pinogondo' ra atan ondo' maalap muno ra maagu no.

⁸Karaa' toojo kapintaran ra galing i; karaa' noyo nailian ru kinamatuaan takali.

⁹Kaayagan takau mariwa' kaga' am kolondo' natandaan takau; itakau mansail koson ra babara' giti ra tana' ti.

¹⁰Kaa' musiti' kou ilaan ru ulun mapintar ra galing i; rongogo' noyo ragu-ragu nilo,

¹¹‘Galaga tumuu' giu' ra intok makatimug ayuk, am mensiang matuum ayuk giu' ra tana' makatimug.

¹²Amon ru lumasak timug, lumonot boo galaga, mataki' poyo intor ra tutuu' ra bokon. Alika, galaga no lakat poyo mamulok kaga' koson tatason am pakayon.

¹³Koson niayuk ra ulun ondo' kalo makaulig ri Aki Kapuuno'; kalansanan nilo matatak paat ilo makalilian ri Aki Kapuuno'.

¹⁴Malansan ilo ra banang ondo' malumot, mangintopot ilo ra tambaloi ru lawa'.

¹⁵Mapiot kia bunsut no amon ru saukon ra sandigan? Maikang kia banang amon saukon ra guutan?’

¹⁶Ulun malaat tumuu' koson ra sakot ragana' ru mato ru orou, koson ra sakot ondo' timinuu' ra titikop ru taman.

¹⁷Bakat nano riminilit ra batu, am liminokot[11] ra moonong batu no.

¹⁸Kaa' kabubul boo sakot no kolondo' ulun nakapandai ra sakot no igondo' soroi ra giu' no.

¹⁹Topot, ginio ayuk kaansukan ra ulun malaat; raino ulun ra bokon ondo' siminuali ra intok nilo.

²⁰Kaa' i Aki Kapuuno' kalo igondo' nangiruan ra ulun ondo' gumagaya', Kalo igondo' No indangano' ulun malaat.

²¹Mompoloso Io rirun makakurit am magilakup ra maansukan,

²²kaa' ulun ondo' masisang rirun tauyuon, am intok ayanan ru ulun malaat pusoon.”