Read Timugon Murut AYUP 9 Bible Online

AYUP 9 - Timugon Murut bible

AYUP 9

¹Kopongo raginio taam i Ayup,

²“Iou, nokorongog aku noyo ra ngaangai' no ragili. Kaa' ati kulaan kia ra ulun mamanang ralalom ru baal nano ri Aki Kapuuno'?

³Ati kulaan kia ra ulun makapagansang Riso? Saribu pangkuatan makuatan takau ri Aki Kapuuno', kaa' rondo' pana kalo mataam ru osoi pana.[12]

⁴Mapintar kaga' i Aki Kapuuno' am makakuasa' saboi kolondo' sangulun pana makaanggal Riso.

⁵Mabandingan No gunung ra mapulalian, am mamuso riso paat ra sumangit.

⁶Ginonggon ri Aki Kapuuno' tana' ti am pinuyu' tana'; inuyog No lugu' napatampakan ra tana' ti.

⁷Mainggalaran ri Aki Kapuuno' mato ru orou sumirang, am mainggalaran butitin-butitin suminda paat ra rondom.

⁸Kolondo' osoi pana ondo' nangindangan ri Aki Kapuuno' namingkal ra limbowon, kapoam nanginjang ra bakulung ru tambuakal ru raat.[13]

⁹Pinaatang ri Aki Kapuuno' butitin-butitin giu' ra limbowon; Biduk, Orion, Kartika am butitin-butitin rabugus.

¹⁰Kalo makarati' takau ra binaal maayo ri Aki Kapuuno', am kaimuagan Nano kalo mauntob.

¹¹Nansail i Aki Kapuuno' ra saang kuno, kaa' kalo nakito ku Io. Nansail Io ra sapapa' kuno, kaa' kalo natutunan ku.

¹²Inalap No atan ondo' kasagaan Nano, am kolondo' osoi pana makapanginga' Riso; kolondo' osoi pana baani mangkuot Riso, “Atan baalon Muno?”

¹³Kalo oroton ri Aki Kapuuno' sangit Nano. Umokon No pantula' Nano, ilo ondo' nangindangan ri Ragab[14] manggal ri Aki Kapuuno'.

¹⁴Ginio ra, ati kulaan aku makaansang ri Aki Kapuuno', am maguyum ra ragu koson tumaam Riso?

¹⁵Kabalu' pana kolondo' sala kuno, atan ikang kuno ondo' ak am makimasi' intor ri Aki Kapuuno', akim kuno?

¹⁶Amon ru mangiou Io ra aku mindagu, kalo mangintopot Aku ra mangkirongog Io raki'.

¹⁷Inulisap No aku ra bagiu' mapuor kaga', am nangambai ra pilat kuno ra kolondo' sasaban.

¹⁸Kalo iowon No aku maminawo; tinotop No kaayagan kuno ra mapait.

¹⁹Musiti' aku kia makimagabu' Riso? Ilai' noyo, mapara' piboo gayo ru ikang Nano. Maibit ku kia Io mongoi ra makama? Osoi kia baani mampiau Riso[15] mongoi?

²⁰Aku ti gumagaya' am kolondo' sala, kaa' ragu-ragu kuno rongogon koson makasala, moonong ragu ondo' mingkual intor ra kabang kuno koson ayuk mononsol raki'.

²¹Kolondo' sala kuno, kaa' raino kalo lioon ku. Nasuraan aku no naayag. Kolondo' boo ondo' maatang. Inda ru itakau motopot kapoam sala, mamuso i Aki Kapuuno' ritakau.

²³Paat kolondo' sala ru ulun no, matoi ra mamulali', makakurit ayuk i Aki Kapuuno'.

²⁴Pinataak ri Aki Kapuuno' tana' ti ra ulun malaat, am nompobolou ra ngaangai' akim. I Aki Kapuuno' nambaal ra ngaangai' ti. Amon ru sala' ka Io, osoi poyo?

²⁵Orou-orou kuno mansail ra maribok kaga', kaa' kolondo' ra songorou pana ondo' mapatasu' ra guang.

²⁶Koson ra parau maribok, kaayagan kuno mansail, koson ra ribok ru kanui mamparakop ra akanon nano.

²⁷Amon ru jumingit aku am kuminam mampalilian ra imbolo', nakapandai aku ra sonsolon aku ri Aki Kapuuno'.

²⁹Sinonsol aku no ri Aki Kapuuno', kua lioo' ku?

³⁰Kolondo' sabun makalulu' ra tula kuno.

³¹Pinapatir aku ri Aki Kapuuno' ra ralalom ru jamol, saboi bayang kuno pana mangkara' ra majaka' aku.

³²Amon ru i Aki Kapuuno' no ulun, makataam aku Riso; mongoi akai ra intok pangakiman koson manalasai ra pansangaran.

³³Kaa' kolondo' osoi pana maalap kasauk ra ulun magayantanga' ondo' makapanalasai ramon ruo.

³⁴Iou Aki Kapuuno', langgai' noyo mangukum raki', langgai' noyo mangilaa' raki'.

³⁵Kalo malaa' aku Riso am mindagu raino, sabap ra nakaulig aku ra guang kuno galama'.