Read Timugon Murut MAZMUR 107 Bible Online

MAZMUR 107 - Timugon Murut bible

MAZMUR 107

¹“Paringkuanang kano ra TUHAN sabap ra Io moonsoi; togom Nano mantilayun!”

²Rulio' min ragu-ragu raginio koson mongompor ra TUHAN, akau ondo' binayag Nano. Binayag No akau intor ra pantula',

³am magibit ramuyun sumaguli' intor ra pagun-pagun suai, intor ra sirangon am kalasaan, intor ra ralayo am rabugus.[81]

⁴Mokoondo' niayuk minugar-ugar ra tana' kaagisan, kalo makauma' ra ralan mongoi ra bandar ondo' makaulun.

⁵Mangaitilan ilo am paason, am kolondo' boo lansanin nilo.

⁶Ralalom boo ru kapaganan, mampiau ilo ra TUHAN, am mamayag Io risilo intor ra makalalaa'.

⁷Aakon No ilo maya' ra ralan mabanis, mongoi ra bandar ondo' maayanan nilo.

⁸Musiti' no maringkuanang ilo ra TUHAN sabap ra togom Nano ra mantilayun, am niayuk binaal Nano ra makaimuag koson risilo.

⁹Ulun pinaason popokon No ra inum, am ulun naitilan basugon No ra ngaangai' ondo' moonsoi.

¹⁰Mokoondo' ulun nakasubol ra kalandaman, ulun inaput nabangkil am naimbolo',

¹¹sabap ra ilo minanggal ra panusuban ri Aki Kapuuno', am marara' ilo ra susuban ru Io Ondo' Maayo Kaga' Kuasa'.

¹²Sabap ra kandoi ra maagat, liminawo guang nilo, maratu' ilo am kolondo' sangulun pana mangindangan risilo.

¹³Ralalom boo ru kapaganan, mampiau ilo ra TUHAN, am bayagon No ilo intor ra makalalaa'.

¹⁴Ibiton No ilo mingkual intor ra kalandaman, am bukaton No rantai ondo' namangkil risilo.

¹⁵Musiti' no maringkuanang ilo ra TUHAN sabap ra togom Nano ra mantilayun, am niayuk binaal Nano ra makaimuag koson risilo.

¹⁶Linunsai No kulobon-kulobon gangsa', am mamandak ra umpok-umpok basi'.

¹⁷Mokoondo' niayuk ulun budu am naimbolo' sabap ra tula nilo, am niayuk inimbolo' sabap ra laat nilo;

¹⁸kolondo' patiakan nilo ra akanon, am mamaar noyo ra kulobon ru kapatayan.

¹⁹Ralalom boo ru kapaganan, mampiau ilo ra TUHAN, am bayagon No ilo intor ra makalalaa'.

²⁰Babason No ilo ra ragu Nano, am kalo polosoon No ilo matoi.

²¹Musiti' no maringkuanang ilo ra TUHAN sabap ra togom Nano ra mantilayun, am niayuk binaal Nano ra makaimuag koson risilo.

²²Musiti' no maringkuanang ilo Riso am mapataak ilo ra taak simbalui, am mapatanou ra binaal Nano ralalom ru rimbai-rimbai maansukan.

²³Mokoondo' niayuk nasundoi ra kapal, maguyum ra rapu' giu' ra raat ondo' malangka'.

²⁴Makito nilo binaal ru TUHAN, binaal Nano ondo' makaimuag giu' ra raat.

²⁵Ralalom ru panusuban Nano, makabagiu' ra mapuor, am mangkinulun ra maayo.

²⁶Ngaangai' kapal nakasimpor ra limbowon, am naratu' ra lonor ru raat; ulun mangalaa' makatingkuang ra babaal makalalaa' koson raginio.

²⁷Kasumpil-kasumpil nilo ayuk koson ra ulun nagauk; nansalinut kapandayan nilo kolondo' boo onong.

²⁸Ralalom boo ru kapaganan, mampiau ilo ra TUHAN, am bayagon No ilo intor ra makalalaa'.

²⁹Angin mapuor pinalinos No, am kinulun pana limininos.

³⁰Maringkuanang ilo ra ngaangai' no limininos, am kapitin No ilo ra intok rurulan ru kapal.

³¹Musiti' no maringkuanang ilo ra TUHAN sabap ra togom Nano ra mantilayun, am niayuk binaal Nano ra makaimuag koson risilo.

³²Musiti' potonowon nilo katulayan Nano ralalom ru timungan ru ulun Nano, am mongompor Riso ra saang ru pantuuman ru tingganai-tingganai.

³³Lasakin sungoi no ru TUHAN, saboi koson ra tana' kaagisan, am pasaukon taur ru timug no ra mapua'.

³⁴Sinauk No tana' ra malabung no ra limayak mapua', kinibit ru kalaatan ru ulun ondo' namagun ra giu' no.

³⁵Kinulau No tana' kaagisan no nasauk ra tulugung, am tana' ra mapua' masauk ra taur ru timug.

³⁶Ulun nangaitilan pinaayan No ra giu' no, am nambaal ilo ra bandar koson intok ayanan.

³⁷Raduon nilo umo am tanamin nilo ra anggur, am makaalap ilo ra ampos masuang.

³⁸Inasian No ulun Nano ra anak masuang, am magalung ra tambiag nilo saboi mansasayat.

³⁹Amon ulun ri Aki Kapuuno' kalaan am asabin ra inulipon kaga' am niayuk imboloon.

⁴⁰TUHAN manauyu' ra ulun mangimbolo' risilo no, mangkinibit risilo tumanggau ra tana' kaagisan.

⁴¹Kaa' binayag No ulun musikin intor ra kapaganan, am mangkinibit ra sasambaloi nilo makaanak ra masuang.

⁴²Ulun moonsoi maansukan makakito ra baal raginio, kaa' ngaangai' ulun malaat pinongkoror.

⁴³Gama' ru ulun mapintar mangkara' ra baal raginio, gama' ru karaan nilo togom ru TUHAN.