Read Timugon Murut MAZMUR 115 Bible Online

MAZMUR 115 - Timugon Murut bible

MAZMUR 115

¹Sala' ka akai, iou TUHAN, sala' ka akai, kaa' Okou ayuk maaya' katulayon am omporon, sabap ra Okou mampagagaya' toojo am monogom ramon.

²Kua kia pangkuot ngaangai' bansa', “Atibo kia i Aki Kapuuno' nilono?”

³I Aki Kapuuno' mai soroi ra suruga'; suguton No atan kasaga' Nano.

⁴Sinungkalalaing nilono binaal intor ra mas am pirok, binangun ru kalindu' ru ulun.

⁵Sinungkalalaing no makakabang kaa' kalo makaindagu, makamato kaa' kalo makakito,

⁶makatalingo kaa' kalo mokorongog, makaarung kaa' kalo makaalok,

⁷makakalindu' kaa' kalo makapuyai, makakalayam kaa' kalo makaugar; ngaangai' sinungkalalaing no kolondo' bolos.

⁸Polosoon noyo ngaangai' ulun ondo' namangun ra sinungkalalaing, am ondo' mangintopot ra sinungkalalaing, masauk ilo niayuk[88] koson ra sinungkalalaing ondo' binangun nilono.

⁹Pangintopot no ra TUHAN, akau ulun ru Israil. Io noyo mangindangan am manindung ramuyun.

¹⁰Pangintopot no ra TUHAN, akau imam ri Aki Kapuuno'. Io no mangindangan am manindung ramuyun.

¹¹Pangintopot no ra TUHAN, akau ngaangai' ulun ondo' sumamba Riso. Io no mangindangan am manindung ramuyun.

¹²Mapakara' TUHAN no ritakau am mambarakat ritakau; mambarakat Io ra ulun ru Israil am ra ngaangai' imam ri Aki Kapuuno'.

¹³Mambarakat Io ra ngaangai' ulun ondo' mangurumat Riso; ioginio ulun langkaya' kapoam musikin.

¹⁴Gama' ru TUHAN no mapakasuang ra anak ramuyun am niayuk papag mino.

¹⁵Gama' ru barakaton kau ru TUHAN, ondo' namangun ra limbowon am tana' ti.

¹⁶Suruga' iono longgom ru TUHAN ayuk, kaa' tana' ti pinataak No ra ulun.

¹⁷Ulun namagatoi kalo mongompor ra TUHAN, ulun ondo' timinuun noyo ra intok ondo' masiluk.[89]

¹⁸Kaa' itakau ondo' maayag maringkuanang Riso, raino am sabuoi-buoi no. Omporo' noyo TUHAN!