Read Timugon Murut MAZMUR 13 Bible Online

MAZMUR 13 - Timugon Murut bible

MAZMUR 13

¹Ra tingganai santimungan maririmbai. Mazmur ri Daut.

²Kula' buoi ra Okou mampalilian raki', iou TUHAN? Kula' buoi ra Okou mansibuni intor raki'?

³Kula' buoi ra aku musiti' mansaan ra kapaganan am mangiluk guang ra orou rondom? Kula' buoi ru pantula' kuno manguasa' raki'?

⁴Ilai' aku no, iou TUHAN, i Aki Kapuuno' kuno am taamo' noyo pakiasian kuno. Kaligago' inan kuno; pai' polosoo' ra aku matoi.

⁵Pai' polosoo' pantula' kuno mindagu ra nangala ilo raki'. Pai' polosoo' ra ilo magasab raki'.

⁶Kaa' sumingkayut aku ayuk ra togom Muno ra mantilayun; maansukan aku sabap ra Okou namayag raki'. Rimbayin ku TUHAN, sabap ra moonsoi Io raki'.