Read Timugon Murut MAZMUR 132 Bible Online

MAZMUR 132 - Timugon Murut bible

MAZMUR 132

¹Rimbai ru ratangan. Iou TUHAN, karaa' noyo i Daut, am ngaangai' kapaganan ondo' sinaanan nano.

²Karaa' noyo samba nali Rirun, iou TUHAN, am bantu' nali Rirun, Ondo' Maikang Kaga', i Aki Kapuuno' ondo' sambaan ri Jakub.

³Kon nano, “Kalo muli' aku kapoam mombolong;

⁴kalo tumangus aku kapoam mokororot,

⁵saboi makapambaal aku ra baloi ru TUHAN, intok ayanan ru Ondo' Maikang Kaga', i Aki Kapuuno' ondo' sambaan ri Jakub.”

⁶Giu' ra Bitligim naining takau ragu koson ra Kaban Nabantuan, am najampa' giu' ra limayak Jaar.

⁷Ongoi takau ra Baloi ru TUHAN, am sumamba Riso ra saang ru panturungan Nano.

⁸Ratong no am ayan no ra Baloi Muno, iou TUHAN, mabaya' ra Kaban Nabantuan, tatandu' ru kuasa' Muno.

⁹Gama' ru ulun Muno magigindii ra maansukan, am ngaangai' imam Muno maayag sumugut ra kasagaan Muno.

¹⁰Nangatang Kou rondo' bantu' ri Daut, ulipon Muno. Iou TUHAN, pai' noyo impayi' raja' ra pinili' Muno.

¹¹ TUHAN nambaal ra bantu' am pator ri Daut; suguton No bantu' Nano. Kon No, “Sangulun ra anak muno saukon Ku ra raja', koson mamarinta am sumuali rirun.

¹²Amon ru anak-anak muno gumagaya' ra nabantuan Kuno, am suguton nilo panusuban Kuno, am sabuoi-buoi no papag nilono manuali rirun koson ra raja'.”

¹³Sion pinili' ru TUHAN; saukon No ra ayanan Nano.

¹⁴Indagu Io, “Gitio noyo intok ayanan Kuno ra sabuoi-buoi no; mayan Aku ragiti.

¹⁵Aniin Ku Sion ra atan ayuk guangon no saboi lumuab-luab; ulun nano ra musikin basugon Ku ra akanon.

¹⁶Imam-imam nano mapakito ra pamayagan intor Raki', am ulun-ulun nano magigindii ra maansukan.

¹⁷Giu' ra Sion sangulun papag ri Daut pasaukon Ku ra raja' ondo' urumaton toojo, paikangon Ku pamarintaan ru raja' pinili' Kuno.

¹⁸Tauyuon Ku pantula'-pantula' nano, kaa' karajaan nano moonsoi ayuk am langkaya'.”