Read Timugon Murut MAZMUR 145 Bible Online

MAZMUR 145 - Timugon Murut bible

MAZMUR 145

¹Rimbai pangamparan ri Daut. Anggakon Tokou, iou Aki Kapuuno' am Raja' kuno; am mongompor aku Rirun ra sabuoi-buoi no.

²Moonong orou aku maringkuanang Rirun; omporon Tokou ra sabuoi-buoi no.

³TUHAN no matulai am maaya' omporon toojo, katulayan Nano kalo maratian takau.

⁴Binaal Muno omporon ru ulun intor ra rondo' sayat saboi ra rondo' sayat; potonowon nilo binaal Muno ondo' makaimuag.

⁵Tunungon ru ulun katulayan Muno am kuasa' Muno, am karaan ku binaal Muno ondo' makaimuag no.

⁶Pabalaan ru ulun binaal Muno ra makaimuag, am pabalaan ku katulayan Muno.

⁷Potonowon nilo nansalinut kinoonsoi Muno, am marimbai koson maansukan ra katimpakan.

⁸TUHAN no motogom am makaasi', moorot no sangit Nano am natikop ra togom.

⁹Moonsoi Io ra moonong ulun, am makaasi' ra ngaangai' binaal Nano.

¹⁰Ngaangai' ilo ondo' maayag ra binaal Muno mongompor Rirun, iou TUHAN, am ngaangai' ulun Muno maringkuanang Rirun.

¹¹Tunungon nilo katulayan am kuasa' Muno koson ra Raja', am mapabala' ra kuasa' Muno,

¹²maa' raginio ngaangai' ulun makapandai ra binaal Muno am kuasa' Muno, am pamarintaan Muno ondo' matulai am makaantak.

¹³Pamarintaan Muno mantilayun, am Okou noyo raja' ra sabuoi-buoi no. TUHAN mampagagaya' ra ulun Nano am manugut ra bantu' Nano; makaasi' Io ra atan ayuk pana baalon Nano.

¹⁴Ulun makakapaganan indanganon No; simoyoon No ulun ra malawo guang.

¹⁵Ngaangai' ilo ondo' maayag ra binaal Muno malansan Rirun, am bulintok no masuku' ra paakanon Mu ilo.

¹⁶Nansalinut kitaakon nilono am gagayaan Mu saboi kolondo' boo uyumon nilo.

¹⁷Matimpok toojo atan ayuk pana baalon ru TUHAN, am makaasi' Io ra atan ayuk pana baalon Nano.

¹⁸Minggaar Io ra ulun ondo' mampiau Riso, am ondo' makiasi' toojo Riso.

¹⁹Tomposon No ngaangai' kasagaan ru ulun ondo' mangurumat Riso; rongogon No pampiawan nilono am mamayag risilo.

²⁰Ampinin No ngaangai' ulun ondo' motogom Riso, kaa' pusoon No ulun ra malaat.

²¹Masalok aku mongompor ra TUHAN; gama' ru ngaangai' ilo ondo' maayag ra binangun Nano mongompor ra inggalan ru TUHAN ra sabuoi-buoi no.