Read Timugon Murut MAZMUR 17 Bible Online

MAZMUR 17 - Timugon Murut bible

MAZMUR 17

¹Pakiasian ri Daut. Rongogo' noyo pakimasian kutu, iou TUHAN, kitaakon kutu koson mangaru' ra katimpakan. Urioo' noyo pantangian kutu, rongogo' noyo pakiasian kuno ra sotopot ti.

²Manungka' Kou raki', sabap ra napandayan Mu atan ondo' motopot.

³Mauligan Mu suang ru guang kutu. Bulintok ra Okou rumatong raki' paat molondom, am mangurio Kou toojo raki', kaa' kolondo' guangon malaat maimansaan Mu ra guang kutu.

⁴Kalo mindagu aku ra malaat, koson ra ulun bokon; gagayaan ku panusuban Muno am kalo mampatoi aku.

⁵Kaayagan kuno masalok sumugut ra panuluan Muno am kalo igondo' tumalansiang.

⁶Makiasi' aku Rirun, iou Aki Kapuuno', sabap ra Okou timinaam raki'; ginio ra kailio' aku am rongogo' noyo ngaangai' raguon kutu.

⁷Patalango' noyo togom Muno ondo' makaimuag no, am bayago' noyo ulun ondo' sumindung Rirun; ra umbir Muno naayag aku intor ra ngaangai' pantula'.

⁸Sindungi' aku, koson ra unor ru mato Muno galama'; taubi' aku ra kawo Muno,

⁹sindungi' aku intor ra ulun malaat ondo' mamatoi raki'. Pantula' ondo' mamatoi liminibung raki';

¹⁰ragu nilono limbau ayuk am kolondo' guang makaasi'.

¹¹Mangilou ilo am liminibung raki', maguyum ilo ra kaluagan koson mamparatu' raki'.

¹²Koson ilo ra singa' ondo' magawang am manungaap raki', koson ra anak ru singa' mansibuni maginaa raki'.

¹³Luat no, iou TUHAN, anggalo' pantula' kuno saboi maala! Bayago' aku ra ilang Muno paat ra ulun malaat mampatoi raki'.

¹⁴Palabuso' aku no intor ra ulun ondo' manimung ra rapu' ra tana' ti. Ratangi' ilo ra karaat ondo' natampos Mu noyo risilo; am ukumi' niayuk ngaangai' anak suku' ra akupu nilono.

¹⁵Magilong aku Rirun sabap ra kolondo' sala kuno; bulintok ra aku makarat, ratangan Muno makaantak ra guang kuno.