Read Timugon Murut MAZMUR 18 Bible Online

MAZMUR 18 - Timugon Murut bible

MAZMUR 18

¹Ra tingganai ru santimungan maririmbai. Mazmur ri Daut, ulipon ru TUHAN. Rinimbai ra TUHAN paat ra TUHAN namayag ri Daut intor ra Raja' Saul am niayuk intor ra ngaangai' pantula' nano.

²Motogom aku kaga' Rirun, iou TUHAN! Okou manungka' raki'.

³TUHAN noyo manindung raki'; Io koson ra batu silian kuno ra mapiot kaga'. I Aki Kapuuno' kuno intok sindungan kuno, naayag aku mabaya' Riso. Sindungin No aku koson ra ampin; manungka' am magalung Io raki' maa' raginio maayag aku.

⁴Mampiau aku ra TUHAN ondo' maaya' omporon, am namayag Io raki' intor ra pantula' kuno.

⁵Patayan ra makalalaa' no liminibung raki', rosob ra mamuso no mapalinjob raki'.

⁶Patayan ra makalalaa' no liminibung raki', am lobong napataan ra balatik sulungan kuno.

⁷Bulintok makakapaganan mampiau aku ra TUHAN; mampiau aku ri Aki Kapuuno' kuno koson makiindangan. Ralalom ru Baloi Nano rongogon No bolos kuno; talinaasin No pampiawan kuno.

⁸Tana' ti pana mogonggon am mauyog; puun ru gunung mauyog am monontol, sabap ra sumangit i Aki Kapuuno'.

⁹Lisun mingkual intor ra arung Nano, apui am baa mingkual intor ra kabang Nano.

¹⁰Lapako' No limbowon am tuun Io ralalom ru gaun molondom ragana' ru kalayam Nano.

¹¹Maribok siab Nano am kinuraan No Kirub;[10] mansiab Io ra rasawat ru kawo ru angin.

¹²Taubin No inan Nano ra kalandaman; gaun majuut kaga' liminibung Riso.

¹³Intor ra ganit ru saang Nano, riminatu' ais am apui, nansabut ra gaun makapal no.

¹⁴TUHAN pana maningkalur intor ra limbowon; am Io Ondo' Masawat Kaga' mapaining ra bolos Nano.[11]

¹⁵Pabakison No panah Nano am kuliagayon No pantula' Nano; pasasakon No ganit no saboi ilo magiru'.

¹⁶Lonor ru raat nasukiap, am lonor ra ralalom ru tana' nakatalang, bulintok ra Okou nansawai ra pantula' Muno, iou TUHAN, am ginalakan Mu ilo ra sangit.

¹⁷Intor ra rasawat pinatutui ru TUHAN kalindu' Nano, ginuut No aku, am paingkualo' No aku intor ra timug ondo' malandom.

¹⁸Binayag No aku intor ra pantula' kuno ra maikang, am niayuk intor risilo ondo' masisang raki', sabap ra pagilayan kuno maikang ilo kaga'.

¹⁹Bulintok ra aku makakapaganan, bulunsaron nilo aku, kaa' TUHAN manindung raki'.

²⁰Pinalabus No aku intor ra makalalaa'; binayag No aku sabap ra Io manungka' raki'.

²¹Moonsoi balos ru TUHAN raki' sabap ra nambaal aku ra motopot; nambarakat Io raki' sabap ra kolondo' sala kuno.

²²Gagayaan ku Ukum ru TUHAN; kalo tatangon ku i Aki Kapuuno' kuno.

²³Ginagaya' ku ngaangai' ukum Nano; kalo igondo' ku tuliari' panusuban Nano.

²⁴Nakapandai Io ra aku kolondo' ruruko, am inggalurin ku mambaal ra sala.

²⁵Ginio ra moonsoi balos Nano raki' sabap ra nambaal aku ra motopot, sabap ra nakapandai Io ra aku ti kolondo' sala.

²⁶Iou TUHAN, gumagaya' Kou ra ulun ondo' gumagaya' Rirun, am moonsoi Kou kaga' ra ulun ondo' moonsoi.

²⁷Pinabala' Mu inan Muno matulai ra ulun ondo' mapasau guang, kaa' makimantula' Kou ra ulun malaat.

²⁸Mamayag Kou ra ulun ondo' minggana' guang, kaa' paganaan Mu ulun ondo' malilimbau.

²⁹Mapataak Kou raki' ra sinda; TUHAN i Aki Kapuuno' kuno manampulau ra kalandaman kuno.

³⁰Manaak Kou raki' ra kaikangan koson mapakala ra pantula' kuno; am kuasa' ondo' kalo maanggal ru pantula'.

³¹Binaal ri Aki Kapuuno' no naatang toojo, bala' ru TUHAN maintopot. Io pinakaampin ru ngaangai' ulun ondo' sumindung Riso.

³²TUHAN noyo rorondo' i Aki Kapuuno'; i Aki Kapuuno' ayuk manungka' ritakau.

³³Io noyo i Aki Kapuuno' ondo' napaikang raki', am napasauk ra ralan kuno kalinuos ayuk.

³⁴Kinaikang No kalayam kuno koson ra kalayam ru tambang; magalung Io raki' giu' ra libung ru gunung.

³⁵Mangubas Io raki' koson mangayou, maa' raginio makabakur ku tanggayan ru panah ra mapakil kaga' no.

³⁶Iou TUHAN, manindung am mamayag Kou raki'; pangindanganan Muno napasauk raki' ra antung am kuasa' Muno magalung ra kaayagan kuno.

³⁷Magalung Kou raki' maa' raginio kalo marakop aku, am kalo niayuk ratuin aku.

³⁸Mangilou aku ra pantula' kuno am mamparakop aku risilo; kalo langgain ku suku' ilo maala.

³⁹Lambaan ku saboi ilo kalo makasukal; ra saang ru mato kuno maaba' ilo am maala.

⁴⁰Nanaak Kou raki' ra kaikangan koson mongoi pangayou, am namanangan kuno ra pantula' kuno.

⁴¹Okou nangkinibit ra pantula' kuno nagiru' intor raki'; pusoon ku ulun ondo' masisang raki'.

⁴²Gumolok ilo ra makiindangan, kaa' kolondo' osoi-osoi pana mangindangan risilo; mampiau ilo ra TUHAN, kaa' kalo tumaam Io risilo.

⁴³Tutukon ku ilo saboi ilo masauk ra kaau ondo' makasiab masampui ru angin; kikinjangin ku ilo koson ra losok giu' ra ralan.

⁴⁴Namayag Kou raki' intor ra ulun mangalaat, am mapasauk raki' mamarinta ra ngaangai' bansa'; bansa' ra kalo nauligan kuno masauk ra mamagun kuno.

⁴⁵Bansa' ra suai pagun kumuku' malaa' raki', am gumagaya' mangkirongog ra panusuban kuno.

⁴⁶Nairu' boo baani nilai; monontol ilo am miningkual intor ra batu silian.

⁴⁷Naayag TUHAN! Koompor noyo manunungka' kuno! Potonowo' noyo katulayan ri Aki Kapuuno' mamamayag kuno!

⁴⁸Pinamanang No aku intor ra pantula' kuno; kinuasa' No ngaangai' bansa' ra saang kuno

⁴⁹am binayag No aku intor ra pantula' kuno. Iou TUHAN, pinamanang Mu aku intor ra pantula' kuno am manindung raki' intor ra ulun mamamatoi.

⁵⁰Ginio ra omporon Tokou ra gino ngai' ru bansa'; am marimbai aku koson mongompor Rirun.

⁵¹I Aki Kapuuno' nanaak ra namanangan maayo ra raja' ondo' pinili' Nano; tagamin No ulun ondo' linantik Nano, ioginio i Daut am papag nano, ra sabuoi-buoi no.