Read Timugon Murut MAZMUR 25 Bible Online

MAZMUR 25 - Timugon Murut bible

MAZMUR 25

¹Mazmur ri Daut. Ra Okou noyo, iou TUHAN, makiasi' aku;

²Iou Aki Kapuuno' kuno, mangintopot aku Rirun. Pai' aku polosoo' tauyuon; pai' polosoo' pantula' kuno magasab raki'.

³Kalaan kalo malimanan ru ulun ondo' mangintopot Rirun, kaa' malimanan ru ulun ondo' mataki' manggal Rirun.

⁴Ilaa' aku no ra atan kasagaan Muno, iou TUHAN, pabalaa' noyo atan kia sotopot no baalon kuno.

⁵Ilaa' aku maa' raginio maayag aku sumugut ra kasagaan Muno, sabap ra Okou mamamayag raki'. Masalok aku lumansan Rirun.

⁶Iou TUHAN, karaa' noyo kaansayan am togom Muno, ondo' nanuluan Muli intor ra galing i.

⁷Ampuno' noyo ngaangai' tula am nasalaan kuno intor ra aku mamulok. Iou TUHAN, ralalom ru katagaman am kaansayan Muno karaa' aku no.

⁸Sabap ra TUHAN no moonsoi am matimpok, tuluin No ulun nakalayau no ra ralan.

⁹Tuluin No ulun ondo' minggana' guang no ra ralan motopot, am mangila' risilo ra kasagaan Nano.

¹⁰Ulun ondo' mampagagaya' ra bantu' am panusuban Nano, tuluin No ra togom am pampagagayaan.

¹¹Iou TUHAN, ampuno' aku no sumugut ra bantu' Muli, sabap ra maayo tula kuno.

¹²Ulun ondo' gumagaya' ra TUHAN tuluin No ra ralan ondo' musiti' sukuon no.

¹³Lumangkaya' ilo, am sayat nilono manungkus ra pamagunan no.

¹⁴TUHAN noyo rangan ru ulun ondo' gumagaya' Riso, am pabalaan No nabantuan Nali risilo.

¹⁵Magail aku malansan ra pangindanganan ru TUHAN, am bayagon No aku intor ra makalalaa' no.

¹⁶Kailio' aku, iou TUHAN, am pakaasi' no raki', sabap ra aku misasangulun am malawo.

¹⁷Kaluago' guang kuno intor ra magalabo, am bayago' aku no intor nansalinut kapaganan.

¹⁸Guango' noyo nansalinut pagon am imbolo' kuno am ampuno' noyo nansalinut tula kuno.

¹⁹Ilai' noyo kinasusuang ru pantula' kuno; masisang ilo kaga' raki'.

²⁰Sindungi' am bayago' aku no; maa' raginio kalo mauyu' aku, sabap ra matong aku Rirun ra makisindung.

²¹Gama' ru kaansayan am kabanisan ru guang kuno mantamung raki', sabap ra mangintopot aku Rirun.

²²Iou Aki Kapuuno', bayago' noyo ulun Muno, Israil, intor ra nansalinut kapaganan nilono.