Read Timugon Murut MAZMUR 27 Bible Online

MAZMUR 27 - Timugon Murut bible

MAZMUR 27

¹Mazmur ri Daut. TUHAN noyo sinda am mamamayag raki'; kalo malaa' aku ra osoi-osoi ayuk pana. TUHAN manindung raki' intor ra nansalinut ondo' makalalaa'; kalo malaa' aku.

²Bulintok ra ulun malaat mongoi bulunsar kinam pampatoi raki', makasaru ilo am maratu'.

³Kabalu' pana ngaangai' ru saujor liminiput raki', kalo malaa' aku; kabalu' pana pantula' kuno mongoi bulunsar raki', pangintapatan kuno ri Aki Kapuuno' kalo makulau.[20]

⁴Rondo' pinakiasian kuno ra TUHAN; rondo' ayuk kinitaak kuno; ioginio mayan ra Baloi ru TUHAN polos ru painawo kuno, koson tumainu ra ondo' nansalinut moonsoi Riso, am makiila' Riso.

⁵Bulintok makakapaganan matong Io manindung raki'; alungin No aku maa' raginio maayag aku ra Baloi Nano, am pootoron no aku giu' ra rasawat ru bulur batu.

⁶Ra ginio kalaan ku ngaangai' pantula' ondo' liminibung raki' no. Ralalom ru guang maansukan magilakup aku am mapataak aku ra taak simbalui ralalom ru Baloi Nano; marimbai aku am mongompor aku ra TUHAN.

⁷Rongogo' aku, iou TUHAN, bulintok ra aku mampiau Rirun. Pakaasi' No raki' am taamo' aku!

⁸Mindagu guang kutu, “Ibok no sumamba Riso.” Mataki' aku matong, iou TUHAN;

⁹pai' pasibunio' inan Muno intor raki'. Pai' no sangit am kasisang raki'. Okou noyo siminauk ra mangingindangan raki'. Pai' aku tatango' kapoam mangimpai raki', iou Aki Kapuuno', mamamayag raki'!

¹⁰Io pana ina' am ama' kuno manatang raki', kaa' TUHAN noyo magalung raki'.

¹¹Ilaa' aku ra kasagaan Muno, iou TUHAN, am kitango' aku no ra ralan matanda', sabap ra pantula' kuno masuang kaga'.

¹²Pai' aku pasubako' ra pantula' kuno, ondo' mongoi panimbaal am pompololob.

¹³Malansan aku ra matutunan ku kinoonsoi ru TUHAN ralalom kaayagan ku ra tana' ti.

¹⁴Pagiimansan kano ra TUHAN! Pangintopot kano Riso am pai' kalawo. Iou, pagiimansan kano ra TUHAN!