Read Timugon Murut MAZMUR 36 Bible Online

MAZMUR 36 - Timugon Murut bible

MAZMUR 36

¹Ra tingganai ru santimungan maririmbai. Mazmur ri Daut, ulipon ru TUHAN.

²Tula mindagu ra liagu ru guang ru ulun malaat, impayin nilo i Aki Kapuuno' am kalo malaa' Riso,

³sabap ra ilo malilimbau, mangkara' ilo tula nilo kalo mapandayan am kalo kasisangin.

⁴Ragu-ragu nilono napanu' ra kalaatan am abau, kalo boo mambaal ilo ra moonsoi am ralalom ru kapintaran.

⁵Mangatang ilo ra malaat bulintok miluluya' ra katil; kolondo' baalon nilono ra moonsoi, am kalo igondo' ilo panatang ra atan-atan malaat.

⁶Iou TUHAN, togom Muno koson sawat ru limbowon, am gagaya' Muno makasuku' ra kinasawat ru gaun.

⁷Kinoonsoi Muno kalo mauyog koson ra gunung maayo, katimpakan Muno koson ra landom ru raat. Okou magalung ra ulun am bibiag.

⁸Iou Aki Kapuuno', mapara' piboo kinologo ru togom Muno, ulun sumindung ra saau ru kawo Muno.

⁹Naasug ilo ra akanon giu' ra Baloi Muno; pinainum Mu ilo intor ra sungoi moonsoi Muno.

¹⁰Okou noyo puun ru nansalinut kaayagan, am sabap ra sinda Muno, makakito akai ra sinda.

¹¹Rayuso' noyo monogom ra ulun ondo' makaulig Rirun, am mambaal ra moonsoi ra ulun ondo' mabanis guang.

¹²Pai' polosoo' ulun malilimbau mongoi bulunsar raki' kapoam ulun malaat mangkinibit ra aku magiru'.

¹³Ilai' kon, ulun malaat naratu' noyo, naaba' ilo, kalo boo makasukal.