Read Timugon Murut MAZMUR 37 Bible Online

MAZMUR 37 - Timugon Murut bible

MAZMUR 37

¹Mazmur ri Daut. Pai' kalasu' guang ra ulun malaat no; pai' solon risilo ondo' nambaal ra sala.

²Mataki' ilo mapuso koson ra sakot, am lumonot koson ra sasakot masansam.

³Pangintopot no ra TUHAN am pambaal kano ra ondo' moonsoi; ayan no ra pagun ragitio am akau pana maayag.

⁴Gogoto' noyo kaayagan moonsoi intor ra TUHAN, am aniin kau saboi majala'.

⁵Pataako' bayag muno ra TUHAN, lansan no Riso am mangindangan Io rirun;

⁶Io mamuun ra kinoonsoi muno makasinda koson ra mato ru orou paat ra tanga' ru orou.

⁷Pai' kalingas maginaa ra TUHAN, inaani' noyo am oroto' guang suku' ra Io mingkuor. Pai' kalasu' guang sabap ra ulun langkaya', kapoam sabap ra ilo ondo' masaga' mamparuung.

⁸Pai' sangit kapoam malasu' guang; baal raginio mangkinibit ayuk mulas ra inan galama'.

⁹Ulun ondo' malansan ra TUHAN makatungkus ra pagun ti, kaa' ulun malaat inggalarin.

¹⁰Ulun malaat mapuso ra mataki'; kabalu' pana uyumon, kalo boo majampa' ilo.

¹¹Ulun ondo' minggana' guang makatungkus ra pagun ti, am makasia' ra kalangkayaan ondo' lumuab-luab.

¹²Ulun malaat maguguum tumula' ra ulun moonsoi am masisang magilong risilo.

¹³Kaa' Tuhan makakurit ra ulun malaat, sabap ra napandayan No ra pupus nilono mamaar noyo.

¹⁴Ulun malaat mamutus ra ilang am palaguron no tanggayan ru panah koson mamatoi ra ulun musikin am naimbolo', am manginggulu' ra ulun moonsoi;

¹⁵kaa' ilang tumobok ra inan nilo galama', am tanggayan ru panah nilono pandakon.

¹⁶Sanganu ayuk pana kuliamos ru ulun moonsoi mologo poyo intor ra kalangkayaan ru ngaangai' ulun malaat,

¹⁷sabap ra pandakon ru TUHAN kuasa' ru ulun malaat am manindung ra ulun moonsoi.

¹⁸Alungin ru TUHAN ulun ondo' gumagaya' Riso, am pagun ti masauk ra longgom nilo ra sabuoi-buoi no.

¹⁹Kalo maimbolo' ilo paat ra kapaganan; maukapan ilo paat ra bitilan.

²⁰Kaa' ulun malaat no matoi; pantula' ru TUHAN matatak koson ra bunga' ru limayak; lumiot ilo koson ra lisun.

²¹Ulun malaat magira' am kalo pasagulion no, kaa' ulun moonsoi mapataak ra kinataau ru guang no.

²²Ilo ondo' binarakat ru TUHAN makatungkus ra pagun ti, kaa' ilo ondo' inulas Nano inggalarin.

²³TUHAN mangitang ra ulun mongoi ra ralan ondo' sukuon no am manindung ra ulun ondo' iniou No.

²⁴Amon maratu' ulun no, kalo majamaran io, sabap ra TUHAN mangitang ra longon nano.

²⁵Ragino matutuo aku no am nabuoi noyo naayag, kaa' kalo igondo' aku pakakito ra ulun moonsoi tatangon ru TUHAN, kapoam sayat nilono makikitaak ra akanon.

²⁶Magail ilo mangani' am mapaira' maya' ra taau ru guang, am ngaangai' sayat nilono nasauk ra barakat risilo.

²⁷Tatango' noyo kalaatan am pambaal noyo ra moonsoi, maa' raginio sayat muno maayag ra pagun ti ra sabuoi-buoi no;

²⁸sabap ra TUHAN masaga' ra ondo' motopot, am kalo manatang ra ulun Nano ondo' gumagaya'. Sindungin No ilo ra sabuoi-buoi no, kaa' sayat ru ulun malaat inggalarin.

²⁹Ulun ra motopot manungkus ra pagun ti, am mayan ragiti ra sabuoi-buoi no.

³⁰Ragu-ragu ru ulun moonsoi no matanda', am ilo galama' pana matimpok.

³¹Buliin nilo Ukum ri Aki Kapuuno' ralalom ru guang am kalo makalisang intor riso.

³²Ulun malaat mongoror ra ulun moonsoi am maguyum ilo ra kaayatan koson mamatoi risilo;

³³kaa' TUHAN kalo mapataak risilo ra pantula'-pantula' nilo kapoam mopoloso risilo ukumin paat ra ilo salasayon.

³⁴Lansan noyo ra TUHAN am gagayaa' noyo panusuban Nano; pataakon No pagun ti rirun koson mangurumat rirun, am makito mu ulun malaat inggalarin.

³⁵Nakakito aku ra ulun malaat ondo' masaga' mangimbolo' ra ulun bokon; ilo no masawat koson ra sawat ru puun sidar giu' ra Libanon;

³⁶Aku pana[24] nansail kaa' kalio ilo boo; inuyum ku ilo kaa' kalo najampa' ku.

³⁷Urioo' min noyo ulun ra moonsoi am ondo' motopot no; ulun ondo' masaga' ra pababansayan makaalap ra papag;

³⁸kaa' ulun makatula no pusoon, am papag nilono pana liomon.

³⁹Ulun ra motopot bayagon ru TUHAN; sindungin No ilo paat ra kapaganan.

⁴⁰Mangindangan am mamayag Io risilo; am niayuk mapalabus risilo intor ra ulun malaat, sabap ra makisindung ilo Riso.