Read Timugon Murut MAZMUR 4 Bible Online

MAZMUR 4 - Timugon Murut bible

MAZMUR 4

¹Ra tingganai santimungan maririmbai. Ondo' sumbayaan ru jitor. Mazmur ri Daut.

²Taamo' noyo amon mampiau aku, iou Aki Kapuuno', Manungka' raki'! Paat ra aku makakapaganan ra galing i, matong Kou mangindangan raki'. Raino pakaasi' no raki', am rongogo' pakiasian kuno!

³Ngaangai' ulun, kula' poyo buoi ra akau magasab Raki'? Kula' poyo buoi ra akau monogom ra baal kolondo' onong no, am mangilou ra ondo' kalo motopot?

⁴Karaa' ra TUHAN noyo nampili' ra ulun ondo' gumagaya' Riso koson ra longgom Nano, am mangining Io paat ra aku mampiau Riso.

⁵Paat ra akau sumangit, pai' boo pakatula. Karaan noyo baal raginio liliwa' mongkoror, paat ra akau miluluya' ra intok kaalangan.

⁶Patutuyo' noyo taak ondo' motopot am pangintopot no ra TUHAN.

⁷Masuang ulun makiasi', “Kasuango' barakat Muno ramon, iou TUHAN. Gama' ru mangiou Kou ramon.”

⁸Okou nambaal ra guang kuno naansukan kaga' intor ra ulun ondo' nalabaan ra akanon am inumon.

⁹Ginio ra miluluya' aku am moonsoi boobolong; Okou ayuk TUHAN, ondo' magalung raki' ra matanda'.