Read Timugon Murut MAZMUR 41 Bible Online

MAZMUR 41 - Timugon Murut bible

MAZMUR 41

¹Ra tingganai ru santimungan maririmbai. Mazmur ri Daut.

²Pakaansuk noyo ulun ondo' makaasi' risilo ondo' kolondo' lulu'; indanganon ilo ru TUHAN, paat ra ilo mokoowot ra kapaganan.

³Sindungin am alungin ilo ru TUHAN, bansukon ilo ru TUHAN ra pagun ti; kalo pataakon ilo ru TUHAN ra pantula'.

⁴Indanganon ilo ru TUHAN paat ra ilo marualan am mapaligag ra inan nilono.

⁵Mindagu aku, “Iou TUHAN, natulaan aku Rirun; pakaasi' no raki' am babaso' aku no!”

⁶Pantula' kuno mangalimut raki'. Masaga' ilo ra aku matoi am lilianin.

⁷Ilo ondo' manambului raki' kalo mabanis guang; timungon nilo nansalinut tanou kalo moonsoi koson raki', am mingkual boo am potonowon nilo ra ati-ati intok.

⁸Ngaangai' ulun ondo' masisang no mansusunur ilo raki', mangkara' ilo ra atan baal ra malaat kaga' koson raki'.[27]

⁹Mindagu ilo, “Malanjag maruol nano am kalo boo makasukal intor ra kaalangan no.”

¹⁰Rangan ra molongkot am niayuk kalansanan kuno, ulun ondo' pabaya' kuno maangkan nakimantula' raki'.

¹¹Pakaasi' noyo raki', iou TUHAN, am babaso' aku no, maa' raginio mabalasan ku pantula'-pantula' kuno.

¹²Aku pana makapandai ra Okou mangiou raki', sabap ra pantula' kuno kalo makapangala raki'.

¹³Mangindangan Kou raki' sabap ra banis ru guang kuno; magibit Kou raki' matong ra saang Muno ra sabuoi-buoi no.

¹⁴Omporo' takau TUHAN, i Aki Kapuuno' ru ulun ru Israil; omporo' noyo Io raino am sabuoi-buoi no. Amin! Amin!