Read Timugon Murut MAZMUR 47 Bible Online

MAZMUR 47 - Timugon Murut bible

MAZMUR 47

¹Mazmur ru bansa' ri Kora. Ra tingganai maririmbai.

²Pagitapap kau, akau ngaangai' bansa'! Omporo' i Aki Kapuuno' ra rimbai ondo' mapuor am mapabansuk!

³TUHAN Ondo' Masawat Kaga' musiti' kalaanin; Raja' ondo' matulai ra titikop ru tana' ti.

⁴Io mangindangan ritakau nangala ra ngaangai' bansa', am mapasauk ritakau ra mamarinta ra bansa'-bansa'.

⁵Tambiliin No itakau ra intok ayanan, koson masauk ra longgom takau, ulun ra tagamin Nano.

⁶Magaloi i Aki Kapuuno' ra panturungan Nano, ondo' indiyon am sinamputan ra bujung.

⁷Omporo' noyo i Aki Kapuuno' no ra rimbai; omporo' noyo Raja' takano ra rimbai!

⁸I Aki Kapuuno' noyo raja' ra titikop ru tana' ti; omporo' Iono ra rimbai!

⁹Miluluya' i Aki Kapuuno' ra kurisi' panturungan Nano ondo' matulai; namarinta Io ra ngaangai' bansa'.

¹⁰Tingganai ru ngaangai' bansa' timinimung mababaya' ra ulun[30] ri Aki Kapuuno' ri Abragam. I Aki Kapuuno' matulai poyo ka ngaangai' mangunguasa' ra bokon; matulai Io toojo.