Read Timugon Murut MAZMUR 50 Bible Online

MAZMUR 50 - Timugon Murut bible

MAZMUR 50

¹Mazmur ri Asap. TUHAN, i Aki Kapuuno' Ondo' Maayo Kaga' Kuasa' no mindagu; nampiau Io ra titikop ru tana' ti intor ra sirangon suku' ra kalasaan.

²Intor ra Sion, bandar ondo' maramai, makasinda i Aki Kapuuno' koson ra mato ru orou.

³Amon ru matong i Aki Kapuuno' takau, kalo mongkoror Io; sinimbula' ru apui sumigulu Riso, rosob ra mapuor liminiput Riso.

⁴Sinusub No suruga' am tana' ti masauk ra sasi', koson magilong Riso manalasai ra ulun Nano.

⁵Mindagu Io, “Luluro' min noyo ulun Kuno ondo' gumagaya', ondo' mangirot ra nabantuan Raki' am piniot poyo ra taak simbalui.”

⁶Limbowon napatanou ra katimpakan ri Aki Kapuuno', sabap ri Aki Kapuuno' noyo akim.

⁷“Rongogo' noyo, akau ulun Kuno, mindagu Aku; sonsolon Takamin, akau Israil. Aku no i Aki Kapuuno', i Aki Kapuuno' min.

⁸Kalo sonsolon Takamin sabap ra taak mino, am taak ra sinimbalui koson mapabansuk ra guang Kuno[32] ondo' masalok pataakon min.

⁹Kalo masaga' aku ra sapi' gawayan intor ra umo mino, kapoam kambing ra tinambiag mino,

¹⁰sabap ra bibiag ra kataunan longgom Kuno, am niayuk sapi' giu' ra tampak ru riribu bulur.

¹¹Ngaangai' susuit masigo longgom Kuno, am ngaangai' ilo ondo' maayag giu' ra limayak.

¹²Amon maitilan Aku, kalo makipakan Aku ramuyun, sabap ra tana' ti am niayuk suang no longgom Kuno.

¹³Mangakan Aku kia ra kual ru sapi' gawayan, kapoam manginum kia ra raraa' ru kambing gawayan?

¹⁴Pataako' min noyo ragu paringkuanangan koson ra taak simbalui ri Aki Kapuuno',[33] pataako' min noyo ngaangai' taak ra binantu' min Riso Ondo' Maayo Kaga' Kuasa'.

¹⁵Piawo' min Aku bulintok ra akau makakapaganan; bayagon Takamin, am omporon min Aku.”

¹⁶Kaa' i Aki Kapuuno' mindagu ra ulun malaat, “Kolondo' kuasa' min mindagu ra ukum Kuno am mangatang ra pansusunuran ra nabantuan Kuno,

¹⁷sabap ra kalo masaga' kau mangapu ra pangilaan Kuno; nangimpai kau ra susuban Kuno.

¹⁸Amon makito min mantatakou, rumangan kau risilo, lumatok kau ra ulun mansawa'.

¹⁹Masalok kau mindagu ra malaat; am kalo manangguang kau mamparuung.

²⁰Uwin min rayuso' pabukat mino, am pongkotob simbaalin ra ragu.

²¹Ginio noyo baalon mino, kaa' mongkoror Aku ayuk, pangkaraan min koson Aku niayuk ramuyun. Kaa' raino mansiwou Aku ramuyun, am saukon Ku baal raginio maalap min intopoto'.

²²Rongogo' min, akau ondo' mampalilian Raki', amon ru kalo, pusoon Takamin; am kolondo' sangulun pana makapamayag ramuyun no.

²³Ulun ondo' mapataak ra ragu paringkuanangan koson ra taak simbalui no koson mangurumat Raki', am ulun ondo' gumagaya' Raki' no bayagon Kuno.”