Read Timugon Murut MAZMUR 52 Bible Online

MAZMUR 52 - Timugon Murut bible

MAZMUR 52

¹Ra tingganai ru santimungan maririmbai. Sisindiron ri Daut,

²bulintok ri Doig, ulun ru Idom no minuma' ra Raja' Saul am nambala' riso ra minongoi noyo i Daut ra baloi ri Abimilik.

³Okou ulun maikang, kua pamanggo kou ra kalaatan muno ra ulun ondo' tagamin ri Aki Kapuuno'?

⁴Monsongorou kou mampaguang ra mangurana' ra ulun; kabang muno malarom koson ra lamiring, am masalok kou ayuk mamparuung.

⁵Motogom kou poyo ra kalaatan intor ra moonsoi, am maansayan poyo manimbaal ra ragu intor ra motopot.

⁶Masaga' kou mapakaruol ra guang ru ulun ra ragu-ragu. Okou mamparuung!

⁷Ginio ra, i Aki Kapuuno' mamuso rirun ra sabuoi-buoi no; rokopon am ralaaton No okou intor ra baloi; pusoon No okou intor ra pagun ru ulun maayag.

⁸Ulun ra motopot malaa' magilong ra binaal koson raginio; makakurit ilo rirun, am mindagu,

⁹“Ilai', gitio noyo ulun ondo' kalo sumindung ri Aki Kapuuno', kaa' lumansan io ra kinalangkayaan nano, am sumindung io ra kuliamos tinakou nano.”

¹⁰Kaa' aku koson ayuk ra puun ru jaitun ondo' timinuu' ra Baloi ri Aki Kapuuno'; lumansan aku ra togom Nano ra sabuoi-buoi no.

¹¹Iou Aki Kapuuno', maringkuanang aku Rirun, sabap ra nansalinut binaal Muno; ra tatanga' ru ulun Muno, potonowon ku kinoonsoi Muno.