Read Timugon Murut MAZMUR 55 Bible Online

MAZMUR 55 - Timugon Murut bible

MAZMUR 55

¹Ra tingganai ru santimungan maririmbai. Ondo' sinumbaya' ra jitor. Sisindiron ri Daut.

²Iou Aki Kapuuno', rongogo' noyo pakiasian kutu; pai' talikuri' kitaakon kutu.

³Iningo' aku am taamo' aku; malawo aku sabap ra pagalabaan kuno.

⁴Magalabo aku sabap ra ilalaanon aku ru pantula' kuno, natutuk aku sabap ra ulun malaat mangimbolo' raki'. Mantipagon ilo raki'; sumangit ilo raki' am masisang raki'.

⁵Malaa' aku kaga', ruol ru kapatayan malarom.

⁶Liniputan aku ru laa' am tontol, sumuun salimbutu.

⁷Amon ru makakawo aku koson ra susuit asang, mansiab aku maguyum ra intok ra kalinuos ayuk.

⁸Maalur kaga' pansiaban kuno; tana' kaagisan pangkararan kuno.

⁹Pulaliin ku maguyum ra intok sindungan koson malaa' ra rasam maawas am bagiu'.

¹⁰Jojowo' raguon ru pantula' kuno, iou Tuhan, sabap ra giu' ra bandar nakito ku ulun kumuliasai-asai ayuk am lumaat.

¹¹Orou rondom lumiput ilo ra bandar, mambaal ra kalaatan am pagagabuan.

¹²Ati-ati pana intok mokoondo' pantutulaan; ralan ra babayaan makito masuang pangimbalaan am pamparuungan.

¹³Amon pantula' manganja' raki', maalap ku koorot; amon ru sangulun pantula' magasab raki', aku pana makasibuni intor riso.

¹⁴Kaa' okou ti, rangan kuno, rangan kuno am niayuk paganja' kuno ra molongkot.

¹⁵Galing i moonsoi sunur-sunur to, am mababaya' sumambayang ra Baloi ru TUHAN.

¹⁶Polosoon pantula' kuno matoi pampuaga', am lakat poyo maayag tumuun ra pagun ru ulun minatoi, sabap ra nototop baloi nilono ra kalaatan, am manguasa' ra guang nilo.

¹⁷Kaa' mampiau aku ra TUHAN i Aki Kapuuno' koson mangindangan raki', am bayagon No aku.

¹⁸Orou rondom aku magalabo am mantangi', am rongogon No bolos kuno.

¹⁹Inibit No aku minuli' ra naayag bulintok ra aku nangayou ra susuang ru pantula'.

²⁰Pamarintaan ri Aki Kapuuno' mantilayun, mangkirongog raki' am kalaan No pantula' kuno, sabap ra kalo boo kulawon nilo guang, am kalo malaa' ri Aki Kapuuno'.

²¹Rangan kuno ra galing i mangayou ra rangan-rangan nali; kalo sinugut no bantu' nali.

²²Ragu-ragu nano maamis kaga' makimasi', kaa' guang nano natikop ra sisang; ragu-ragu nano molomoi kaga', kaa' tumobok ra guang koson ra ilang malarom.

²³Pataako' noyo pagalabaan muno ra TUHAN, am manungka' Io ramuyun; kalo polosoon No ulun mabanis guang kalaan.

²⁴Kaa' Okou, iou Aki Kapuuno', mamuso ra ulun mamparuung am ulun mamamatoi ra kalo poyo malintanga' umur nilono. Kaa' ra aku, mangintopot aku Rirun.