Read Timugon Murut MAZMUR 57 Bible Online

MAZMUR 57 - Timugon Murut bible

MAZMUR 57

¹Ra tingganai santimungan maririmbai. Sumugut ra rimbai: Pai' pusoo'. Mazmur ri Daut, bulintok ra io nansibuni ra luang ru batu koson manuliar ra Raja' Saul.

²Pakaasi' no raki', iou Aki Kapuuno', pakaasi' no raki', sabap ra maguyum aku ra pamayagan intor Rirun. Nakaalap aku ra sindungan ra saau ru kawo Muno, saboi nakasail noyo bagiu'.

³Ri Aki Kapuuno' Ondo' Masawat Kaga' piawon ku, Io noyo i Aki Kapuuno' ondo' nakapandai ra kasagaan kuno.

⁴Intor ra suruga' taamon am bayagon No aku; kalaan No ulun ondo' mangulipon raki'. I Aki Kapuuno' manulu' raki' ra togom am gagaya' Nano raki'.

⁵Pantula' kuno manguyung raki', ilo koson ra singa' mangakan ra ulun. Ripon nilono koson ra tanggulan am panah; rila' nilono koson ra ilang ondo' malarom.

⁶Iou Aki Kapuuno', patalango' noyo kinaatang Muno giu' ra limbowon, am katulayan Muno ra titikop ru tana' ti!

⁷Pantula' kuno napataan ra jajaling koson mamparakop raki', am malawo guang kuno. Kaliin nilo aku ra luang giu' ra ralan kuno, kaa' ilo galama' maratu' ra ralalom no.

⁸Iou Aki Kapuuno', mintopot aku toojo Rirun, rimbayin am omporon Tokou!

⁹Singkarat no, alii salibuor kuno! Singkarat no, alii gambus am jitor! Pasingkaraton ku mato ru orou!

¹⁰Iou TUHAN, maringkuanang aku Rirun intor ra ngaangai' bansa'. Omporon Tokou intor ra ngaangai' ulun.

¹¹Togom Muno masawat suku' ra limbowon. Gagaya' Muno saboi ra gaun ondo' masawat.

¹²Iou Aki Kapuuno', patalango' noyo kinaatang Muno giu' ra limbowon, am katulayan Muno ra titikop ru tana' ti.