Read Timugon Murut MAZMUR 6 Bible Online

MAZMUR 6 - Timugon Murut bible

MAZMUR 6

¹Ra tingganai santimungan maririmbai. Ondo' sumbayaan ru jitor. Maya' ra layuk kabalu'. Mazmur ri Daut.

²Iou TUHAN, pai' aku no sangiti' paat ra Okou sumangit! Pai' aku ukumi' paat ra Okou sumangit!

³Pakaasi' no raki', iou TUHAN sabap ra naagui aku; kaligago' aku no sabap ra totopot naagui aku.

⁴Guang kutu maimamang. Ra kula' buoi Muno manatang raki', iou TUHAN?

⁵Ratong no TUHAN am bayago' aku no, sabap ra togom Muno bayago' aku no intor ra kapatayan.

⁶Giu' ra intok ru minatoi kalo boo karaan Kou; kolondo' osoi pana mongompor Rirun giu' ra pagun ru ulun minatoi.

⁷Kolondo' boo lulu' kutu sabap ra mangiluk toojo guang kutu; moonong rondom kaalangan kuno naasa' ra tangi'; bantal kuno naasa' ra lomou.

⁸Mato kuno majapul am minangkut ra taatangi', ngaangai' no intor ra kinibit ru pantula'-pantula' kuno.

⁹Ugar kano, akau ulun malaat! Nangining TUHAN no ra tangi' kuno;

¹⁰Mangining Io ra kitaakon kuno, am mangiou Io ra pakiasian kuno.

¹¹Ngaangai' ru pantula' kuno nakatigog am mauyu' am pagindibok ilo lukiat.