Read Timugon Murut MAZMUR 64 Bible Online

MAZMUR 64 - Timugon Murut bible

MAZMUR 64

¹Ra tingganai ru santimungan maririmbai. Mazmur ri Daut.

²Rongogo' pakiasian kuno — iou Aki Kapuuno', makakapaganan aku! Malaa' aku ra pantula' kuno — bayago' aku no!

³Sindungi' aku intor ra pampakatan ru ulun malaat, am intor ra ulun ondo' nausung.

⁴Rila' nilono malarom koson ra ilang, ragu-ragu nilono makabisa' koson ra logot.

⁵Mingkual ilo intor ra pansibunian am manimbaal ilo; ulun moonsoi simbaalin nilo.

⁶Mangunsu' ilo ra rangan-rangan koson mambaal ra malaat; mansusunur ilo koson mangatang ra jajaling; indoson nilo kolondo' ulun nakakito.

⁷Mangatang ilo ra malaat am mindagu, “Mangatang takau ra kalaatan ondo' malamog.” Malandom kaga' guang am pangkaraan ru ulun, saboi kalo mapandayan.

⁸Kaa' pabakison ri Aki Kapuuno' panah Nano risilo, bulintok niayuk raginio majamaran ilo.

⁹Imboloon ilo ri Aki Kapuuno' sabap ragu-ragu nilono;[40] ngaangai' ulun makakito risilo mamisik.

¹⁰Mangalaa' ilo; malaa' ilo ra guangon ri Aki Kapuuno' am potonowon nilo atan ondo' binaal Nano.

¹¹Ngaangai' ulun moonsoi maansukan sabap ra atan ondo' binaal ru TUHAN; sindungin ilo ngai' ri Aki Kapuuno'; ngaangai' ulun ondo' mabanis guang no mongompor Riso.