Read Timugon Murut MAZMUR 68 Bible Online

MAZMUR 68 - Timugon Murut bible

MAZMUR 68

¹Ra tingganai santimungan maririmbai. Mazmur ri Daut. Rimbai.

²Bigor i Aki Kapuuno' am pantutuliaro' pantula' Nano. Ulun ondo' masisang Riso nagiru' intor Riso.

³Inggalarin ilo ri Aki Kapuuno' koson ra lisun siniob ru angin; ulun malaat maimbolo' ra saang ri Aki Kapuuno' koson ra dian lumuu' ra apui.

⁴Kaa' ulun ri Aki Kapuuno' marikamo am maansukan ra saang Nano; magigindii ilo ra maansukan.

⁵Rimbayi' noyo i Aki Kapuuno', omporo' noyo inggalan Nano; pabatango' noyo ralan ru Io ondo' sumiab maya' ra gaun.[42] Inggalan Nano TUHAN — parikamo kano ra saang Nano!

⁶I Aki Kapuuno' ondo' minayan ra intok Nano ra matulai, magalung ra anak nailusan ra matuo am manindung ra ulun napuor.

⁷Ulun ondo' kolondo' pabukat aniin No ra intok, am mapalabus Io ra ulun narakop suku' ilo maansukan; kaa' ulun mangalaat makaayan ra tana' mapua'.

⁸Iou Aki Kapuuno', bulintok ra Okou naningganai ra ulun Muno, bulintok ra Okou minugar ra tana' kaagisan,

⁹tana' ti mapuyu' am limbowon maparatu' ra rasam, sabap ra saang Muno, minindagu i Aki Kapuuno' giu' ra Sinai,[43] saang ri Aki Kapuuno' ru ulun ru Israil.

¹⁰Paratuon Mu rasam maawas, am niayuk mapatapuli' ra tana' mapua',

¹¹am ulun Muno mayan ra giu'; ralalom kinoonsoi Muno, alungin Mu ulun musikin.

¹²Manaak Tuhan ra panusuban Nano, am masuang ruandu' magibit ra tanou:

¹³“Ngaangai raja' am saujor nagigiru' noyo!” Ruandu' ra baloi mantayar ra kuliamos ondo' ginaau, am ondo' natatang magagalung ra domba bulintok ra mangayou

¹⁴nakaalap ra susuit asang ra binaal ondo' inan nano natikop ra pirok, ondo' kawo nano inangkupan ra mas manguliat.

¹⁵I Aki Kapuuno' Ondo' Maayo Kaga' Kuasa' manguliagai ra ngaangai' raja' ra giu' koson ra ais batu rumatu' ra Gunung Jalmon.

¹⁶Mapara' piboo gayo ru gunung Basan, gunung ra masuang tampak!

¹⁷Kua intor ra tampak muno ra masuang no tontong muno sumolon ra Bulur Sion[44] ondo' pinili' ri Aki Kapuuno' koson ayanan Nano? Sabuoi-buoi no TUHAN mayan ra giu'.

¹⁸Ralalom kaaparan ribu ru kurita' kuda Nano ra maayo, matong Tuhan intor ra Sinai[45] mongoi ra intok ondo' matulai no.

¹⁹Magaloi Io ra intok masawat, magibit ra ulun masuang ondo' rinakop mababaya' Riso, am mangapu ra taak intor ra ulun mangalaat. TUHAN i Aki Kapuuno' mayan ra giu'.

²⁰Omporo' i Aki Kapuuno', sabap ra Io noyo namayag ritakau; moonong orou Io mansaan ra kapaganan takau.

²¹I Aki Kapuuno' takano TUHAN ondo' mamayag; Io noyo mapalabus ritakau intor ra kapatayan.

²²Ulu ru pantula' no popolon ri Aki Kapuuno', ilo ondo' marayus maayag ralalom ru tula.

²³Mindagu Tuhan, “Ibiton Ku pantula' mino saguli' intor ra Basan, ibiton Ku ilo saguli' intor ra raat ondo' malandom,

²⁴maa' raginio maalap min kabagui' kalayam mino ra raraa' nilono, am uku' mino mantila' ra raraa' nilo saboi ilo majala'.”

²⁵Ngaangai' ulun magilong ra ugar guguluyur ra Okou namanang, iou Aki Kapuuno', ugar guguluyur ri Aki Kapuuno' kuno, Raja' kuno mumpos ra Baloi Nano.

²⁶Ulun maririmbai mugar pagulu am ulun mangkuli ra miujik tumauli, am ralaa mangasas ra tamburing mangkilolot risilo.

²⁷“Omporo' noyo i Aki Kapuuno' ondo' minunor ra ulun Nano; akau ngaangai' papag ri Jakub, omporo' min TUHAN!”

²⁸Binjamin, bansa' boborok toojo minugar pagulu, am tingganai-tingganai ru Jiuda siminimpung ra pulalai nilono, miniku' noyo tingganai-tingganai ru Jibulon am Naptali.

²⁹Patalango' noyo kuasa' Muno, iou Aki Kapuuno', kuasa' ra pinakai Muno ra tayar mai.

³⁰Ngaangai' raja' mapataak Rirun ra tangguang giu' ra Baloi Muno ra Jirusalim.

³¹Sawayo' noyo Misir, maayag ra masigo no minunor ra katabuan; sawayo' noyo ngaangai' bansa', sampulalai sapi' gawayan am niayuk ngaangai' anak nilono, saboi sumamba ilo ngaangai' am mapataak ra pirok no Rirun. Pantuliaro' noyo ulun ra masaga' mangayou!

³²Ngaangai' duta intor ra Misir minatong mapataak ra gangsa'; ulun intor ra Itiopia[46] naringkaagou nagibit ra tangguang pataakon ri Aki Kapuuno'.

³³Rimbayi' min noyo i Aki Kapuuno', akau ngaangai' karajaan ru tana' ti, parimbai kano ra rimbai mongompor ra Tuhan,

³⁴Riso ondo' makasail ra limbowon ra galing i. Rongogo' pampiawan Nano ra mosongou.

³⁵Apuo' noyo kuasa' ri Aki Kapuuno'; titikop ru Israil Io namarinta, makito kuasa' Nano giu' ra limbowon.

³⁶Mapara' piboo kinatulai ri Aki Kapuuno' takau bulintok ra Io miningkual intor ra inayanan Nano, i Aki Kapuuno' ru ulun ru Israil manaak ra kuasa' am ikang ra ulun Nano. Omporo' noyo i Aki Kapuuno'!