Read Timugon Murut MAZMUR 71 Bible Online

MAZMUR 71 - Timugon Murut bible

MAZMUR 71

¹Iou TUHAN, matong aku makisindung Rirun; pai' aku polosoo' tauyuon.

²Sabap ra Okou natimpok, indangano' am palabuso' aku no. Rongogo' aku no am palabuso' aku no!

³Sauk no ra sindungan kuno ra mapiot, am kubu ra maikang koson manindung raki'; Okou noyo manindung am manungka' raki'.

⁴Iou Aki Kapuuno' kuno, bayago' aku no intor ra ulun malaat, intor ra kuasa' ru ulun ondo' kalo natimpok am mapuka'.

⁵Iou TUHAN Raja', malansan aku Rirun; mangintopot aku Rirun intor poyo ra kinamuloko' kuno.

⁶Lumansan aku Rirun buoi ru painawo kuno; intor noyo ra aku kakaanak i, manindung Kou raki'. Masalok aku mongompor Rirun.

⁷Kaayagan kuno masauk ra tiluon moonsoi ru ulun masuang, sabap ra Okou manunungka' raki' ra maikang.

⁸Songorowon ku mongompor Rirun am mapatanou ra katulayan Muno.

⁹Pai' aku impayi' raino sabap ra matutuo aku noyo; pai' aku tatango' raino sabap ra malawo aku.

¹⁰Pantula' kuno mampatoi raki'; maguguum ilo am mampapakat gumula' raki'.

¹¹Mindagu ilo, “Nanatang i Aki Kapuuno' no riso; ilowo' takau am rokopon io, sabap ra kolondo' osoi-osoi pana mamayag riso!”

¹²Iou Aki Kapuuno', pai' aku inggaluri', iou Aki Kapuuno' kuno, ribaki' noyo mangindangan raki'!

¹³Polosoon noyo ilo ondo' mangayou raki' no kalaan am niayuk pusoon! Polosoon noyo ilo ondo' kuminam mangurana' raki' no tauyuon am asabin!

¹⁴Masalok aku lumansan Rirun, rayusin ku ompor kuno Rirun.

¹⁵Paraguon ku kaansayan Muno; songorowon ku mapatanou ra pamayagan intor Rirun no, kabalu' pana baal raginio nakasail ra pangaratian kuno.

¹⁶Omporon ku binaal Muno ondo' kolondo' mokogondo', iou TUHAN Raja', potonowon ku kinoonsoi Muno, kinoonsoi Muno ayuk.

¹⁷Nangila' Kou raki' intor ayuk poyo ra kinamuloko' kuno; saboi raino potonowon ku binaal Muli ondo' makaimuag no.

¹⁸Raino matutuo aku no am uanon aku no, pai' aku tatango', iou Aki Kapuuno'. Bayaa' aku bulintok ra aku mapatanou ra kuasa' am katulayan Muno ra ngaangai' papag ra matong ti.

¹⁹Kinoonsoi Muno, iou Aki Kapuuno' minujak saboi ra limbowon. Mangaayo binaal Muno; kolondo' mokogondo' Rirun!

²⁰Kapaganan kapoam imbolo' porotongon Mu raki', kaa' pasagulion Mu ikang kuno; painggaluron Mu aku intor ra lobong.

²¹Saukon Mu aku ra urumaton toojo; mangansuk Kou poyo raki' saguli'.

²²Omporon am rimbayin Tokou ondo' sumbayaan ru jitor; omporon ku gagaya' Muno, iou Aki Kapuuno' kuno. Rimbayin Tokou ra mazmur ondo' sumbayaan ru jitor, iou Aki Kapuuno' ru ulun ru Israil, Aki Kapuuno' Ondo' Matulai.

²³Bulintok ra aku mangkuli ra jitor indiyon Tokou; marimbai aku ra sotopot-topot ru salibuor kuno, sabap ra namayag Kou noyo raki'.

²⁴Songorowon Ku mantunung ra gagaya' Muno, sabap ra ilo ondo' kuminam mangurana' raki' no kinala noyo am tinauyu' noyo.