Read Timugon Murut MAZMUR 74 Bible Online

MAZMUR 74 - Timugon Murut bible

MAZMUR 74

¹Sisindiron ri Asap. Kua tatango' Mu akai koson ragitio, iou Aki Kapuuno'? Sabuoi-buoi no kia Okou sumangit ra ulun Muno?

²Karaa' noyo ulun ra pinili' Muli intor ra galing, bansa' ra pinalabus Muli intor ra pangulipanan koson masauk ra ulun Muno. Karaa' noyo Bulur Sion, inayanan Muno ra galing i.

³Ratong no ra intok ondo' napuso ti; nansalinut suang ru Baloi Muno pinuso ru pantula' mai.

⁴Pantula' Muno magigindii ra Baloi Muno; pinatansok nilo bandira' ra giu' no tatandu' ra ilo namanang.

⁵Pagilayan risilo koson ayuk ra sangungulun mantagar ra tataun ondo' mantagar ra tataun no ra kapak.

⁶Pinopol nilo ngaangai' timbok intor ra tataun no ra kapak am panaa'.

⁷Sinuruan nilo Baloi Muno saboi naumpo; am intok sambaan Rirun i jinamol nilo.

⁸Gumogot ilo mamuso toojo ramon; ngaangai' intok sambayangan ra pagun ti sinuruan nilo.

⁹Nabi-nabi am baal-baal makaimuag kalo boo makito, am kolondo' sangulun pana makapandai sanggilan pupus ru babaal ragitio.

¹⁰Saboi sanggilan, iou Aki Kapuuno', pantula' maino magasab Rirun? Sabuoi-buoi no kia ilo magasab Rirun?

¹¹Kua karara' Kou mangindangan ramon? Kua pai' Kou pampaguang koson mangindangan ramon?

¹²Kaa' Okou noyo Raja' mai, iou Aki Kapuuno', intor poyo ra galing i; masalok Kou manaak ramon ra kamanangan ra pagun ti.

¹³Ralalom kaikangan Muno raat no linapak Mu am mamabak ra ulu ru ilo ondo' maayag ru raat.

¹⁴Tinutuk Mu ulu-ulu ru Liwiatan, am pataakon baangkai no ra bibiag[50] ru tana' kaagisan koson ra akanon.

¹⁵Baalon Mu taur am sungoi tumilis; kinapua' Mu sungoi ra mangaayo.

¹⁶Binangun Mu matawang am molondom; inaru' Mu intok ru mato ru orou am bulan;

¹⁷inaru' Mu pambaitan ru tana' ti; binangun Mu bulintok malasu' am bulintok masimu'.

¹⁸Kaa' karaa' noyo, iou TUHAN, ati kulaan pantula' Muno magasab Rirun; kalo makaulig ilo Rirun am magasab ilo Rirun.

¹⁹Pai' pataako' ulun Muno ondo' kolondo' lulu' no ra pantula' ondo' malaat kaga'; pai' liliani' ulun Muno ondo' inimbolo'!

²⁰Karaa' noyo nabantuan ondo' inaru' Muli ramon, sabap ra masuang pampatayan ra moonong intok molondom ra pagun ti.

²¹Pai' polosoo' ulun ra inimpayan no tauyuon, gama' ru ulun musikin am naimbolo' mongompor Rirun.

²²Ingkakat noyo, iou Aki Kapuuno', am misungka' Kou galama' sabap ra monsongorou Okou asabin ru ulun ondo' kalo makaulig Rirun.

²³Pai' liliani' golok ru pantula' Muno sumangit, loos nilono kolondo' pupus.