Read Timugon Murut MAZMUR 76 Bible Online

MAZMUR 76 - Timugon Murut bible

MAZMUR 76

¹Ra tingganai santimungan maririmbai. Ondo' sumbayaan ru jitor. Mazmur ri Asap. Rimbai.

²Nakatanou i Aki Kapuuno' giu' ra Jiuda, inggalan Nano sasabiton giu' ra Israil.

³Makaintok Io giu' ra Jirusalim; minayan Io ra Bulur Sion.

⁴Giu' no pandakon No panah ru pantula' Nano, am gagampin am ilang, am niayuk ngaangai' kuliamos ru mangayou.

⁵Iou Aki Kapuuno', matulai Kou kaga', bulintok ra Okou siminaguli' intor ra gunung-gunung intok nangalaan Mu ra pantula'-pantula' Muli.

⁶Ulun-ulun baani ginaawan noyo; nokororot ilo am kalo boo sumukal-sukal; ngaangai' kaikangan am kapandayan nilono kolondo' boo onong.

⁷Bulintok ra Okou mangingilaa', iou Aki Kapuuno' ri Jakub, kuda am niayuk nangura' riso no maratu' am matoi.

⁸Kaa' Okou, iou TUHAN, kalaanin ru ulun. Bulintok ra Okou sumangit no osoi kia tumaan?

⁹Intor ra suruga' inaru' Mu noyo namalantasan; ulun ru tana' ti malaa' am mongkoror,

¹⁰bulintok ra Okou mingkakat no maparatu' ra ukuman, koson mamayag ra ngaangai' ulun ondo' inimbolo' ra tana' ti.

¹¹Sangitan ru ulun mangkinibit ayuk ra pangamparan maayo poyo koson Rirun. Ilo ondo' naayag intor ra pangayawan mambaal ra pangiantakan Muno.

¹²Suguto' noyo atan ondo' binantu' muli' ra TUHAN, i Aki Kapuuno' muno; maaru' ngaangai' bansa' ondo' nakapaginggaar magibit ra taak, koson pataakon Riso ondo' kalaanin.

¹³Pamarinta ra malilimbau ratuin No, am raja'-raja' ru tana' ti monontol malaa' Riso.