Read Timugon Murut MAZMUR 83 Bible Online

MAZMUR 83 - Timugon Murut bible

MAZMUR 83

¹Mazmur ri Asap. Rondo' rimbai.

²Iou Aki Kapuuno', kua pai' Kou paguta'; pai' pongkoror ayuk!

³Ilai' noyo! Pantula' Muno lumaat, am ulun ondo' masisang Rirun manggal.

⁴Mampaguang ilo ra mangalaat manggal ra ulun Muno; maguguum ilo manggal ra ulun ondo' sindungin Muno.

⁵Konilo, “Pusoo' takau bansa' nilono, maa' raginio lilianin Israil ra sabuoi-buoi no!”

⁶Maguguum ilo rondo' guang koson manggal Rirun;

⁷ulun ru Idom am ulun ru Ismail, ulun ru Moab am ulun ru Gagri;

⁸ulun ru Gibal, ulun ru Amon, am ulun ru Amalik, ulun ru Palistin am ulun ru Tirus.

⁹Ulun ru Asyur pana minaya', ilo rangan ra maikang ru ulun ru Amon am ulun ru Moab, papag ri Lot.

¹⁰Ondo' poyo pamakuan Muno ra ulun ru Midian, am Sisira am niayuk Jabin giu' ra sungoi ru Kisyon, ginio niayuk pamakuan Muno risilo.

¹¹Kinala Mu ilo giu' ra Indor, am baangkai nilo nauntung ayuk ra tana'.

¹²Ondo' poyo pamakuan Muno ri Orib am i Jiib; ginio niayuk pamakuan Muno ra tingganai nilono; kalaa' ngaangai' namarinta risilo no koson ra Okou nangala ri Jiba am i Salmuna,

¹³ondo' minindagu ra, “Gaawon mai tana' ri Aki Kapuuno'.”

¹⁴Iou Aki Kapuuno', patauko' ilo koson ra kaau, koson ra rami masiob ru angin.

¹⁵Koson ra apui monolob ra kataunan, am simbula' ru apui mangumpo ra bulur-bulur,

¹⁶ilowo' ilo maya' ra bagiu' Muno, am ilalaano' ilo ra timpalak Muno.

¹⁷Tauyuo' ilo, iou TUHAN, maa' raginio mangiou ilo ra kuasa' Muno.

¹⁸Polosoo' ilo kalaan am malaa' ra sabuoi-buoi no; polosoo' ilo matoi ra asabin!

¹⁹Polosoo' ilo makapandai ra Okou ayuk TUHAN, Ondo' Masawat Kaga' ra titikop ru tana' ti!