Read Timugon Murut MAZMUR 88 Bible Online

MAZMUR 88 - Timugon Murut bible

MAZMUR 88

¹Rondo' rimbai. Mazmur ru bansa' ri Kora. Pataakon ra tingganai ru santimungan maririmbai. Maya' ra rimbai ri: Magalat Liyanot. Sisindiron ri Giman, ulun ru Ijragi.

²Iou TUHAN, i Aki Kapuuno' ondo' namayag raki', bulintok ra matawang mampiau aku Rirun, bulintok ra molondom matong aku ra saang Muno.

³Rongogo' noyo pakiasian kuno; rongogo' noyo pampiawan kuno ra makiindangan.

⁴Masuang kaga' kapaganan lumumpa' raki'; kapatayan maaja' nakaibol noyo ra kulobon.

⁵Koson aku ayuk ra ulun ondo' makauma' ra kapatayan; ngaangai' ru kinaikang kutu natatak boo;[59]

⁶pinatatang aku magayantanga' ra ulun namagatoi; koson aku ayuk ra ulun napatoi ondo' nakalangan ra lobong, ulun ra lingon nalilianan Mu noyo, ondo' kalo boo maindangan Muno.

⁷Pinapatir Mu aku ra lobong malandom, ralalom ru luang ra molondom kaga' am malandom kaga'.

⁸Sinumangit Kou kaga' raki', sangit Muno koson ayuk ra kinulun ru raat ondo' lumapos raki'.

⁹Okou nangkinibit ra ngaangai' ru rangan kuno nangiruan raki'; Okou nangkinibit risilo mataman raki'. Naaput aku am kalo boo makaingkual;

¹⁰mato kuno majapul sabap ra imbolo'. Iou TUHAN, moonong orou aku mampiau Rirun, patunuyon ku longon ra aku makiasi' Rirun.

¹¹Nambaal Kou kia ra kaimuagan risilo ondo' namagatoi? Liminuat ilo kia am mongompor Rirun?

¹²Sasabiton kia togom Muno ru ulun ralalom ru lobong, kapoam gagaya' Muno sasabiton giu' ra intok ru kapatayan?

¹³Makito kia kaimuagan Muno ra intok molondom no, kapoam makito kia kinoonsoi Muno giu' ra pagun ondo' linilianan noyo ru ulun?

¹⁴Iou TUHAN, makiindangan aku Rirun; moonong ra susuab ti makiasi' aku Rirun.

¹⁵Iou TUHAN, kua impayi' Mu aku? Kua pasibunio' Mu inan Muno intor raki'?

¹⁶Intor poyo ra aku lalaing i aku naimbolo' am mamaar poyo matoi; kolondo' boo lulu' kuno mansaan ra ukuman Muno.

¹⁷Sangit Muno ra moporos lumumpa' raki', ayou Muno ra moporos no mamuso raki'.

¹⁸Ngaangai' raginio koson ra liur ondo' liminiput raki' buoi ru songorou, am manguyung raki' intor ra moonong tingkuangan.

¹⁹Okou noyo nangkinibit ra rangan kuno nangiruan raki'; kalandaman ayuk mamparangan raki'.