Read Timugon Murut MAZMUR 90 Bible Online

MAZMUR 90 - Timugon Murut bible

MAZMUR 90

¹Pakiasian ri Musa, ulipon ri Aki Kapuuno'. Iou Tuhan, Okou noyo intok mai sumindung, saboi ra sabuoi-buoi no.

²Kalo poyo sinauk Mu ngaangai' bulur, kalo poyo binangun Mu tana' ti, Okou noyo i Aki Kapuuno' ra mantilayun, i Aki Kapuuno' ra sabuoi-buoi no.

³Susubon Mu ulun sumaguli' ra nanaukan risilo, sinauk Mu ilo pasagulio' ra tana'.

⁴Saribu ngambilor pangkaraan Mu songorou; koson orou ra mai' i nakasail noyo, koson rondo' sumuali mantamung bulintok molondom.

⁵Pupusin Mu bayag mai, bayag mai koson ra rondo' inupi. Koson akai ayuk ra sakot ondo' manalantar bulintok ra susuab ti,

⁶ondo' tumuu' am mambusak, kaa' lumonot am matoi bulintok ra mamai'.

⁷Sabap ra sangit Muno mamuso ramon; malaa' akai sabap ra sangit Muno.

⁸Giu' ra saang Muno pabalaan Mu tula maino, tula mai ra nakasibuni makito Muno.

⁹Sabap ra sangit Muno kinariwa' Mu umur mai; pupus ru bayag mai koson ra rondo' labus ra paminawaan.

¹⁰Umur mai tulu' ngoopor ngambilor ayuk, amon ru maikang makasuku' balu' ngoopor; kaa' pagalabaan am kapaganan ayuk malimanan mai; kaayagan mataki' mapupus am akai pana lumiot.

¹¹Osoi kia nakaili' ra sangit Muno moporos kaga'? Osoi kia makatutun ra kinibit ru sangit Muno?

¹²Palimano' akai no mapara' piboo kinariwa' ru umur mai, maa' raginio masauk akai ra ulun mapintar.

¹³Iou TUHAN, sanggilan pupus ru sangit Muno? Saguli' no am pakaasi' no ra ulipon-ulipon Muno.

¹⁴Pasasaro' noyo togom Muno ramon ra moonong susuab, maa' raginio makaparimbai akai am maansukan buoi ru painawo mai.

¹⁵Anii' akai ra kaansukan ondo' kinasuang nano mogondo' ra kapaganan ondo' sinaanan mai moonong bilor ru kaimbalaan.

¹⁶Patalango' noyo binaal Muno ra makaimuag no ramon, ulipon-ulipon Muno, am kuasa' Muno ondo' matulai pataakon ra papag maino.

¹⁷Iou TUHAN, i Aki Kapuuno' mai, barakato' akai no, am anii' akai ra ampos moonsoi ra atan ayuk kondoyon mai.