Read Timugon Murut MAZMUR 91 Bible Online

MAZMUR 91 - Timugon Murut bible

MAZMUR 91

¹Ulun ondo' sumindung Riso Ondo' Masawat Kaga', ulun ondo' siminindung Riso Ondo' Maayo Kaga' Kuasa',

²makaindagu Riso, “Okou noyo manungka' raki' am mangampin raki'. Okou noyo i Aki Kapuuno' kuno; mangintopot aku Rirun.”

³Mangampin Io rirun intor ra ngaangai' makalalaa' ondo' nakasibuni, am intor ra ngaangai' salinut ru maruol ra makapatoi.

⁴Sindungin No akau ra kawo Nano; maayag kau ralalom ru pagalungan Nano; gagaya' Nano mangampin am magalung rirun.

⁵Kalo pana malaa' kou ra karaat bulintok ra molondom, kapoam ayou mamulali' bulintok ra matawang,

⁶kapoam maruol malaat tumapik bulintok ra molondom, kapoam sauk mampaluus bulintok ra tanga' ru orou.

⁷Saribu ngaulun maaru' lair maratu' matoi ra kiing muno, kapoam mopor ngaribu ra libung muno, kaa' okou kalo majamaran.

⁸Pulolowon mu libung muno am makito mu ulun malaat ukumin.

⁹Saukon mu TUHAN ra manunungka' rirun,[63] Ondo' Masawat Kaga' no manindung rirun,

¹⁰ginio ra okou kalo matiu' ra karaat, baloi muno kalo malumpa' ru usung.

¹¹Susubon ri Aki Kapuuno' malaikat Nano magalung rirun, koson manindung rirun ra ati-ati pana angayan muno.

¹²Apuon nilo okou ra kalindu' nilono, maa' raginio kalayam muno kalo makasaru ra batu.

¹³Kukuo am singa' kikinjangin mu, singa' ra masigo am kukuo ra mabisa'.

¹⁴Ragu ri Aki Kapuuno', “Bayagon Ku ulun ra monogom Raki' no, alungin Ku ulun ra mangiou Raki' no koson ra TUHAN.

¹⁵Bulintok ra mampiau ilo Raki', tumaam Aku risilo. Bulintok ra ilo makakapaganan, indanganon Ku ilo. Bayagon Ku ilo am urumaton Ku ilo.

¹⁶Kaawaron Ku umur nilono, am bayagon Ku ilo.”