Read Timugon Murut MAZMUR 96 Bible Online

MAZMUR 96 - Timugon Murut bible

MAZMUR 96

¹Rimbayi' noyo TUHAN no ra rimbai nakabagu! Rimbayi' noyo TUHAN, akau titikop ru tana' ti!

²Rimbayi' noyo TUHAN, am omporo' Io no! Moonong orou potonowo' noyo tanou moonsoi ra Io noyo namayag ritakau.

³Potonowo' noyo katulayan Nano ra ngaangai' bansa', am ngaangai' binaal Nano ondo' makaimuag toojo ra ngaangai' ulun.

⁴TUHAN no matulai am musiti' Io omporon kasawato', musiti' Io urumaton makasail poyo intor ra ngaangai' ru dewa.

⁵Ngaangai' dewa ru bansa' ra bokon sinungkalalaing ayuk, kaa' TUHAN noyo ondo' namangun ra limbowon.

⁶Katulayan am urumat liminiput Riso, intok Nano natikop ra kuasa' am kaantakan Nano.

⁷Akau ngaangai' ulun ra tana' ti, omporo' noyo TUHAN! Omporo' noyo katulayan am kaikangan Nano!

⁸Omporo' noyo inggalan ru TUHAN ondo' matulai; pagibit kano ra taak am subol kano ra intok Nano.

⁹Igulatur no ra saang ru TUHAN bulintok ra Io sumalula';[65] kalaa' kano ra saang Nano, akau titikop ru tana' ti!

¹⁰Pabalaa' noyo ra ngaangai' bansa', “TUHAN noyo raja'! Piniot No tana' ti am kalo boo mauyog; mangakim Io ra ngaangai' bansa' ra sotopot-topot no.”

¹¹Pakaansuk no, akau tana' ti am limbowon! Indagu no, okou raat am ngaangai' ru suang muno!

¹²Pakaansuk no, akau ngaangai' umo am nansalinut timinuu' no! Ngaangai' timinuu' ra kataunan magitapap ra maansukan,

¹³bulintok ra TUHAN matong mamarinta ra tana' ti. Parintaan No namagun ra tana' ti ralalom ru kabanisan ru guang am matimpok.