Read Timugon Murut MAZMUR 97 Bible Online

MAZMUR 97 - Timugon Murut bible

MAZMUR 97

¹TUHAN noyo raja'! Okou tana' ti, pakaansuk no! Akau pulu'-pulu' ru raat, pakaansuk no!

²Linibungan Io ru gaun am kalandaman; namarintaan Nano sumugut ra ukum am katimpakan.

³Apui sumigulu Riso, monolob ra pantula' ra libung Nano.

⁴Ganit Nano makatampulau ra tana' ti; tana' ti monontol magilong ra sinda Nano.

⁵Bulur lumuu' koson ra dian ra saang ru TUHAN, ra saang ru TUHAN titikop ru tana' ti.

⁶Limbowon mapabala' ra katimpakan Nano, am ngaangai' bansa' magilong ra katulayan Nano.

⁷Ngaangai' ulun sumamba ra sinungkalalaing tauyuon, ngaangai' dewa migulatur[66] ra saang ru TUHAN.

⁸Namagun ru Sion maansukan, am ngaangai' bandar giu' ra Jiuda maansukan, sabap ra namatasan Muno, iou TUHAN.

⁹Iou TUHAN Ondo' Maayo Kaga' Kuasa', Okou noyo namarinta ra titikop ru tana' ti; Okou noyo makakuasa' ka ngaangai' ru dewa.

¹⁰Motogom TUHAN ra ulun ondo' masisang ra kalaatan;[67] sindungin No kaayagan ru ulun Nano, am mamayag risilo intor ra kuasa' ru ulun malaat.

¹¹Kinoonsoi ri Aki Kapuuno' no makasinda koson ra sinda ru ulun mabanis guang, am mapabansuk ra ulun moonsoi.

¹²Pakaansuk no, akau ngaangai' ondo' mabanis guang, sabap ra atan ondo' binaal ru TUHAN. Karaa' noyo binaal ri Aki Kapuuno' ondo' matulai, am paringkuanang no Riso.