Read Timugon Murut AMSAL 1 Bible Online

AMSAL 1 - Timugon Murut bible

AMSAL 1

¹Gitio noyo amsal-amsal ri Salomo buayoi ri Daut, raja' Israil.

²Kuayan no mangindangan ra ulun atan koson masauk ra mapintar, am makapandai ra ugar ru kaayagan am niayuk makarati' ra ragu-ragu ondo' malandom arati' nano.

³Amsal ragitio mangila' ati kulaan ulun maayag ra mapintar, mabanis guang, matimpok am motopot.

⁴Ulun kolondo' kailian ilaan no saboi makaalap ra pangkaraan malarom, am ulun mamulok ilaan no masauk ra ulun mapandai am makapangkara' koson ra matutuo.

⁵Intor ra amsal ragitio ulun mapintar pana rumuang katutunan nano, am ulun makainigilaan mokoowot ra pangilaan.

⁶Baal raginio maratian nilo ondo' nakasibuni arati' no ralalom ru amsal am aration nilo ragu-ragu ru ulun mapintar am niayuk sundait ondo' pasalulaan nilo.

⁷Koson mokoowot ra kaintutunan, pagulu akau musiti' mangurumat am malaa' ra TUHAN.[1] Ulun sasambungon kalo maringkuanang ra kapintaran am marara' ilaan.

⁸Karaa' noyo atan rinagu ru matuo muno rirun, anak kuno,

⁹sabap ra pangilaan nilono mamparuang ra kaansayan muno koson ra sapak ru ulu am sisigot koson mamparuang ra kinantalur muno.

¹⁰Amon ru ulun makatula mangambi' rirun, anak kuno, pai' gagayaa' pangambian nilono.

¹¹Amon ru mindagu ilo, “Ibok, uyumo' takau ulun namatoi risilo. Ongoyo' takau gabuo' ulun ra kolondo' sala koson ra kukuli ayuk!

¹²Raino kaayagan nilo matasu' am kolondo' maruol, kaa' pupus no masauk ilo koson ra ulun matikapatoi.

¹³Alapon takau kuliamos nilo ra mologo, maa' raginio baloi takano napanu' ra kuliamos ondo' ginaau!

¹⁴Baya' no ramon, tatayaron takau ampos ru tinakou takano!”

¹⁵Anak kuno, pai' kau baya' ra ulun koson raginio. Inggalur kau risilo.

¹⁶Kalo moorot nilo guang mambaal ra kalaatan, gogolong ka mampatoi ilo mataki'.

¹⁷Kolondo' onong mapataan ra pukot ondo' malimparang makito ru susuit rokopon no,

¹⁸kaa' ulun malaat mapataan ra landak ondo' masulungan nilo galama' — landak ra makapatoi risilo galama'.

¹⁹Ulun ondo' maguyum ra akanon ralalom kalaatan bayarin niayuk ra painawo nilo galama'.

²⁰Rongogo' noyo! Kapintaran no mampipiau giu' ra ralan-ralan am pasar,

²¹mampiau ra ulun ralalom bolos matangil giu' ra kulobon ru garabang am ati-ati ayuk ulun mantitimung:

²²“Alii ra ulun budu! Kula' poyo buoi ra akau masauk ra budu? Kula' poyo buoi ra akau magasab ra katutunan? Sanggilan akau migigila'?

²³Iningo' min aku mangila' ramuyun. Pinsanin takamin, am mantayar ramuyun ra katutunan kuno.

²⁴Piawon takamin rumatong kaa' kalo mangkirongog kau. Kalo lioon min aku.

²⁵Ngaangai' pinson kuno kalo suguton min am kalo mangapu ra pangilaan kuno.

²⁶Ginio ra, bulintok ra akau makauma' ra kapaganan ra tauli no, kuritin takamin. Bulintok ra akau malumpa' ra makalalaa' asabin takamin.

²⁷Makalalaa' no rumatong koson ra bagiu' magibit ra asab am mangkinibit ramuyun marualan am maimbolo'.

²⁸Bulintok raginio mampiau kau raki', kaa' kalo taamon takamin. Maguyum kau raki' ra ati-ati ayuk kaa' kalo matuum min aku.

²⁹Akau masisang mintutun ra kapintaran am kalo masaga' gumagaya' ra TUHAN.

³⁰Kalo igondo' kau gagaya' ra bilin kuno kapoam mampalio ra sawai am ila' kuno.

³¹Intor raginio, malimanan min kinibit ru binaal am ginuang min ra mangalaat.

³²Ulun ra kolondo' katutunan matoi sabap ra mampalilian raki', am ulun budu mapuso sabap ra kalo mampalio raki'.

³³Kaa' osoi mangkirongog raki' io maayag. Kaayagan nano moonsoi am kalo pana malaa'.”