Read Timugon Murut AMSAL 12 Bible Online

AMSAL 12 - Timugon Murut bible

AMSAL 12

¹Ulun ondo' motogom ra katutunan matasu' makaalap ra sawai, kaa' ondo' kalo masaga' sawayon iono ulun sasambungon.

²Ulun moonsoi kaansayin ru TUHAN, kaa' ulun ondo' mangatang ra kalaatan makaapu ra ukuman.

³Kolondo' sangulun pana bayagon intor ra kalaatan, kaa' ulun mabanis guang mantilayun am kalo mauyog.

⁴Andu' ra moonsoi masauk ra kaansukan ru ralaki nano, kaa' andu' ra mapakauyu' ra ralaki nano koson ayuk ra maruol kinso ondo' mapasauk ra bungul mopopol.

⁵Ulun mabanis guang mangkara' ra baal-baal moonsoi, kaa' pinson ru ulun malaat ruung ayuk.

⁶Ragu-ragu ru ulun malaat makapatoi, kaa' ragu-ragu ru ulun mabanis guang mapakaayag.

⁷Ulun malaat matoi am kalo makapanatang ra papag, kaa' ulun moonsoi masalok makapapag.

⁸Ulun mapintar makaapu ra ompor; ulun sasambungon makaapu ra pagasaban.

⁹Moonsoi poyo masauk ra ulun nasuangan ondo' mokoondo' ra pangandayan, kaa' migiangku ra ulun maayo kaa' maitilan.

¹⁰Ulun moonsoi magalung ra tinambiag nilono, kaa' ulun malaat mangimbolo' ra tinambiag nilono.

¹¹Magitatanom ra mamaan kalindu' makaalap ra akanon masuang, kaa' ulun mangilou ra baal ondo' kolondo' onong iono sasambungon.

¹²Ulun malaat mampaguang ra kalaatan ayuk, kaa' ulun moonsoi koson ayuk ra puun ondo' maikang am mangkawa'.

¹³Ulun malaat masulungan ru ragu nilo galama', kaa' ulun moonsoi makalabus intor ra kapaganan.

¹⁴Balos ru sasangulun maya' ra ragu am binaal nano galama'; makaalap io ra balos ra maaya'.

¹⁵Ulun sasambungon masalok mangkara' ra io motopot, kaa' ulun mapintar mangkirongog ra bilin.

¹⁶Ulun sasambungon mataki' sumangit bulintok maabigan, kaa' ulun mapintar kalo lioon no pagasaban.

¹⁷Mindagu ra motopot mapabigor ra katimpakan, kaa' mindagu ra magabau makakinibit ra kalo matimpok.

¹⁸Ragu-ragu ra moporos makapilat ra guang koson motobok ru ilang, kaa' ragu ra mapintar koson ra tatapis makapali'.

¹⁹Abau kalo mantilayun, kaa' katapatan mantilayun ra sabuoi-buoi no.

²⁰Ulun mangatang ra kalaatan napanu' ra ruung; ulun mampaguang ra pangindanganan iono makakaansukan.

²¹Ulun moonsoi kalo malumpa' ru karaat, kaa' ulun malaat masalok malumpa' ru kapaganan.

²²Masisang TUHAN ra ulun magabau, kaa' maansukan Io ra ulun ondo' manugut ra bantu'.

²³Ulun mapintar kalo mapatalang ra katutunan nilo, kaa' ulun sasambungon mapakito ra kinasambung nilono.

²⁴Mapirot mangandoi mapasauk ra ulun makakuasa', kaa' matiar mangkinibit ra ulun masauk ra ulipon.

²⁵Pagalabaan mangkinibit ra ulun mangiluk guang, kaa' ragu-ragu ra moonsoi makaansuk ra guang.

²⁶Ulun moonsoi mangitang ra rangan nano, kaa' ulun malaat mapalayau ra ulun.

²⁷Ulun matiar kalo igogondo' kasaboi gogoton nilono, kaa' ulun mamaan kalindu' mokoowot ra rapu' masuang.

²⁸Ulun ondo' maya' ra ralan motopot kaayagan nano napanu' ra bansuk, ulun ondo' maya' ra ralan malaat makatingkuang ra kapatayan.