Read Timugon Murut AMSAL 13 Bible Online

AMSAL 13 - Timugon Murut bible

AMSAL 13

¹Anak ra mapintar, manugut ra pangilaan ru ama' nano, kaa' ulun malilimbau kalo masaga' manugut ra pangilaan.

²Ragu-ragu ru ulun moonsoi magibit ra balos moonsoi, kaa' ulun ra kalo mabanis guang masaga' ra kalaatan.

³Ulun mindagu ra totomolon ayuk, mangampin ra inan galama'. Ulun mindagu ra jajajou, maninduol ra inan galama'.

⁴Ulun matiar ondo' masuang gogoton, kalo masugut no. Ulun mamaan kalindu' makaalap ra atan ayuk gogoton no.

⁵Ulun mabanis guang masisang ra abau, kaa' ragu-ragu ru ulun malaat mapakauyu' am magibit ra pagasaban.

⁶Kabanisan ru guang mangampin ra ulun kolondo' sala, kaa' kalaatan mamuso ra ulun makatula.

⁷Mokoondo' ulun sumalu ra langkaya', sotopot no kolondo' atan-atan linonggom no. Mokoondo' niayuk sumalu ra ulun musikin, sotopot no langkaya' io.

⁸Ulun langkaya' mamakai ra ruit maa' raginio kaayagan nano moonsoi ayuk, kaa' ulun musikin makalabus intor ra kaayagan makalalaa'.

⁹Ulun motopot koson ra lampung makasinda, kaa' ulun malaat koson ra lampung matikalasa'.

¹⁰Limbau magibit ra kapaganan; ulun mapintar mangapu ra pangilaan.

¹¹Linangkayaan noowot ra ralan maluoi, makai' mataki', kaa' rapu' ra tinimung-timung rumuang poyo.

¹²Bulintok kalansanan matutuk, guang pana matutuk; bulintok ra gogoton masugut, guang maansukan.

¹³Ulun ondo' kalo mampagagaya' ra ragu ri Aki Kapuuno' maninduol ra inan galama', kaa' ulun ondo' gumagaya' ra susuban ri Aki Kapuuno' makaalap ra balos moonsoi.

¹⁴Pangilaan ru ulun mapintar koson ra uur ru kaayagan; bulintok ilaanon, pangilaan raginio mamayag ra painawo.

¹⁵Ulun mapintar makaalap ra urumat, kaa' ulun ra kalo maintopot tumingkuang ra kapatayan.

¹⁶Ulun mapintar masalok mangkara' pagulu ra kalo poyo mamatas, kaa' ulun sasambungon mapatalang ra sambung nilo.

¹⁷Ulun sinusub ra kolondo' guang maparatong ra kapaganan, kaa' ulun sinusub ra maintopot maparatong ra kaansayan.

¹⁸Ulun ra kalo masaga' ilaan maaru' masauk musikin am maasaban, kaa' ulun ondo' mampalio ra bilin maaru' urumaton.

¹⁹Mapara' piboo bobonsoi makaalap ra atan gogoton! Ulun sasambungon kalo masaga' manalikur ra kalaatan.

²⁰Ulun ondo' lumatok ra ulun mapintar masauk io mapintar; ulun makimangkubayau ra ulun sasambungon maaru' io makakapaganan.

²¹Kapaganan milou ra ulun makatula, kaa' ulun moonsoi makaapu ra kaansayan.

²²Ulun moonsoi patungkuson no rapu' nano ra anak am akupu, kaa' rapu' ru ulun makatula patungkuson ra ulun ondo' mabanis guang.

²³Tana' ra kolondo' tatanom mabuli mapaingkual ra ampos am akanon ru ulun musikin, kaa' ulun ra kalo matimpok manginga' ra tana' no kondoyon.

²⁴Ulun ra kalo mapalamba' ra anak nano, kalo motogom ra anak no. Ulun motogom ra anak no io musiti' mangubas ra anak no.

²⁵Ulun moonsoi masalok maukop ra akanon, kaa' ulun malaat masalok maitilan.